Flapper
Flapperes (engles, franses: garçonnes) ia es un jenera de femes joven de la mundo ueste en la desenio de 1920 ci ia porta faldas corta (a la jeno ia es corte per acel periodo), corti sua capeles, escuta a jaz, e ostenta sua despeta per cual ia es alora videda como condui asetable. Flapperes ia es regardada como egosa per usa macia esedente, bevi alcol, fumi sigaretas en publica, gida autos, trata seso en un modo casual, e en otra modos iniora la normas sosial e sesal. Flapperes ia es icones de la "dudeses rujinte" (la desenio de 1920 tumultosa), la turbas sosial e political, la crese de intercambia transatlantica cual ia segue la fini de Gera Mundal 1, e la esporta de la cultur de jaz american a Europa. Ma on ave ance un reata a esta "contracultur", spesial par persones plu vea e plu tradisional ci parteni a otra jeneras. Los ia alega ce la robas de la flapperes ia es "cuasi nudia", "desrespetosa", e "nonintelijente".
La nom "flapper" pote deriva de un usa plu temprana en England per un prostituida joven, cual ia es redirijeda a xicas joven jeneral, e spesial los ci ia es vivosa. Ma un otra posible es ce la nom deriva de la jergo de la teatre per un presentor fema joven jinastin, e per un fem joven ci dansa la xarleston en un stilo cual inclui la bate de sua brasos (en engles: flapping).
Comensa
[edita | edita la fonte]En april 1908, la sesion de moda de la Globe and Traveler ("globo e viajor") ia conteni un article "la vestes de la fem joven" con la esplica seguente:
Americanes, e acel persones engles fortunosa, de ci sua mone e clase permete ce los entra libre a la parolas de jergo... nomi la sujeto de esta linia "la flapper". La conveni de esta terma no move me a tal amira zelosa de la potias stonante de rici nosa linguas cual la americanes aseta umil ce los posese..., e cual, en fato, merita apena la onora de un momento de mea atende, ma per la fato ce me xerca futil per cualce otra espresa cual es comprendeda como sinifia acel person joven e importante, la fem joven con sirca 16 anios.
En sua leson en febrero 1920 sur la suprapasa de femes joven en Britan causada par la perde de omes joven en gera, Dr R. Murray-Leslie ia critica "la tipo de papilio sosial... la flapper nonseria, mancada vestida, "jazinte", nonfidable, e nondisiplinada, per ci un dansa, un xapo nova, o un om con un auto, ia es plu importa ca la destina de nasiones."
La usa de la nom flapper ia coaveni con un moda entre xicas joven en la SUA en la desenio 1920 temprana per porta botas de cauxa nonliada, e un etimolojia falsa sperdeda vasta cual dise ce los ia es nomida flappers car los flapped (bateda) cuando los pasea, car los ia porta sua botas nonliada, mostrante ce los defia la normas en un modo simil a la moda en la sentenio 21 per sapatos nonliada. Un otra sujesta per la orijina de la parola, relatante a la moda, deriva de un moda de la desenio 20 en cual femes joven ia permete sua jacones resta nonbotonida afin lo ta flap asi e ala cuando los pasea, per apare plu autonom e libre de la modas victorian.
La istoriste Gordon A. Craig ia scrive (The Germans, 1991)
En tota nasiones, la Gera Mundal 1 ia debili ortodoxias e autorias vea, e cuando lo ia fini, no governa, no eglesa, no scola, no familia ia ave la potia per regula la vives de umanas como lo ia es fada a ante. Un resulta de esta ia es un cambia profonda en la maneras e morales cual ia crea un sosia plu libre e min restrinjeda. Femes ia benefica de esta tan multe como cualce otra person. Prescrives antica de cual es o no es condui coreta per los ia posese no plu multe credablia, e tabus sur apare nonacompaniada en locas publica, o la usa de licor o tabaco, e an relatas sesal ante sposi, ia perde sua fortia... Femes no ia es plu tan propensada a la tirania de sosia como los ia es a ante.
Un otra causa de la cambia en la condui de femes joven ia es la mori de miliones de omes joven en la gera, e la epidemica de gripe cual, comensante en 1918, ia mata entre 20 e 40 milion persones, ia inspira en persones joven un senti ce vive es corta e pote fini a cualce momento. Donce, femes joven ia desira spende sua jovenia per joia sua vive e libria, en loca de resta a casa, espetante per un om per sposi.
Cambias political ance ia causa la cultur de la flapper. Pos la gera, la teni de la sistem de clase ia es reduida a ambos lados de la Atlantica, coraji clases diferente per interata e comparti sua senti de libria. Femes ia gania final la direta per vota en la SUA a 26 agosto, 1920. Femes ia desira deveni la egales sosial a omes, e ia es fasada con la reali difisil de la goles plu grande de femisme: individualia, partisipa plen en politica, autonomia economial, e diretos de seso. Los ia desira es tratada como egal a omes e vade fumi e bevi. En ajunta, multe femes ia ave plu oportunias en emplea e ia an prende carera tradisional mas, como dotores, avocatos, injeniores, e pilotes. La crese de consumisme ia promove la ideales de "sasia e libria", cual coraji femes per pensa autonom sur sua vestes, careras, e ativias sosial.
Sosia ia cambia rapida pos la gera. Per esemplo, costumes, tecnolojia, e fabrica ia move rapida a en a sentenio 20 pos la interompe de la gera. La usa cresente de la auto ia es un fator importante en la cultur de la flapper, car autos ia permete ce un fem ta pote veni e vade como el desira, viaja a speakeasies (bares nonlegal) e otra locas de divertis, e usa la veculos grande de la eda per sua ativia popular, encontras de petting ("caresa sesal"). Ance, la buma economial ia permete plu persones la tempo e mone per jua a golf e tenis e per vacanses, cual ia nesesa vestes ajustada a esta ativias. La silueta magra de la flapper ia es multe conveninte per move.
Evolui
[edita | edita la fonte]La "Gibson Girl" (xica de Gibson) ia es un de la orijinas de la flapper. La inventa de Charles Dana Gibson, esta femes ia cambia la moda, patronas, e stilos de vive de la desenio de 1920. Los ia es multe plu progresante ca la tradisiones de moda per femes en la pasada. Ante esta promove, la voses de femes como un grupo no ia es oiada frecuente. Femes ia gania plu autonomia, ia xerca emplea estra la casa, ia demanda la direto per vota e otra diretos, atende plu a sua propre desiras e min a la desiras de la omes en sua vives. Los ia asentua ance la importa de intelijentia e aprende, en loca de servi omes e cura per enfantes.
La moda de la Gibson Girl ia permete un vive plu ativa ca presedente. La faldas e robas ia es longa e esvasada, con colos alta e mangas streta. La stilo ia es videda como masin, cual ia es a veses asentuada par porta un cravata. An si femes ia porta ancora la corsetos, un tipo de corseto ia es introduida cual, lo es imajinada, ia es plu bon per la spina dorsal. Un figur formida como un S ia deveni popular, con un peto e ancas grande, e un taie corsetida e multe peti. Capeles longa ia deveni plu popular, brosida alta en un masa de risas. An si los ia es capas e autonom, los ia es sempre bela e refinada. La imajes de la Gibson Girl ia esajera sua alta e ia sujesta atletisme.
La idea de la Gibson Girl ia es un tipo tipal american, comparada a la stilos european. Lo ia es presentada como un tipo cual cualce fem pote ateni, de cualce clase, joven o no tan joven, e an de razas otra ca la blanca - un idea rara a la eda.
La apare prima de la stilo de la flapper en la SUA ia veni de la filma popular de 1920 The Flapper par Frances Marion, con Olive Thomas como la stela. El ia ata en un rol simil en 1917, ma la terma "flapper" no ia es usada. En sua filmas final, el ia es regardada como la imaje de un flapper. Otra atores, como Clara Bow, Louise Brooks, Colleen Moore, e Joan Crawford va pronto developa sua careras sur la mesma imaje, e ia ateni popularia grande.
En la SUA, la despeta comun per proibi (de alcol) ia es un fator en la aveni de la flapper. Con bares e cabares cluida, la "speakeasies" ia deveni plu comun e popular. Esta devia entre la promove de tempera (asteni de alcol) fundida sur relijio e respeta per la leges, e la consuma omnipresente de alcol en realia, ia condui a un despeta vasta per autoria. La autonomia de flapperes ia es ance un responde a la Gibson Girls de la desenio de 1890. An si acel stilo de ante la gera no sembla la stilo de la flapperes, sua autonomia ia resulta, posible, en la persiste de la defia de la flapperes de 30 anios a pos.
Autores en la SUA, como F. Scott Fitzgerald e Anita Loos, e imajores como Russell Patterson, John Held joven, Ethel Hays, e Faith Burrows, ia populari la moda e vive de flapperes tra sua obras, e flapperes ia deveni regardada como atraente, fretosa, e autonom. Un psicolojiste de Harvard ia reporta ce la flapperes ia ave "la grado la plu basa de intelijente" es composa "un problem futil per educores.
Un otra scrivor, Lynne Frame ia dise en sua libro ce multe siensistes e profesales de sania ia analise la grado de feminia de la condui e apare de la flapperes, cual tende dona un apare simil a xicos joven. Frames ia ance sujesta ce la capeles corta e robas corta distrae la atende a la curvas femin. Alga jinecolojistes ia sujesta ce femes como los ia es min sposable. En otra parolas, la flapper ia es espresante de un nebli de la roles de la sesos, cual la espertas regarda como desastrosa.
En 1922, un jornal peti - The Flapper, locada en Chicago - ia selebra la atrae de la flapper. Lo ia declara la rompe de valuas tradisional. La flapperes ia contrasta se con la jeneras plu temprana, cual los nomi "vites teninte" e restrinjeda e pasiva. Ma los no ia reconose ce la jeneras presedente de ativistes fema ia fa posible la esiste libre de la flapperes
En Deutxland, jornales nova ia apela a femes joven deutx con imajes sensosa e anunsias per veste e ajuntables los ta vole compra. La pajes lisa de Die Dame e Das Blatt der Hausfrau ia mostra la Girl, pd la flapper. El ia es joven e modosa, autonom economial, e un consumor zelosa de la modas nova. La jornales ia aida el per sabe la modas nova, artes, sportes, automobiles, e telefones.
La flapper es un de la imajes de jovenia e la fem nova la plu durante en la sentenio 20, e es videda par multe oji como un eroe cultural. Ma multe persones en la desenio de 1920 ia vide los como un menasa a sosia tradisional. An si la plu de los ia es fias de la clase media, los despeta la valuas de la clase media. Los ia iniora sua parentes, dansa riscosa, e flirta con xicos. Los ia valua stilo e novia plu ca tradision, e plasir plu ca virtua. Xicas ia jua un rol plu inisiante en relatas. Dansas como la xarleston, la ximi, la bunny hug ("abrasa de la coneta"), e la black botton ("basa negra"), cual ia es videda como xocante par jenitores, ia es simboles de la rejeta de tradision.
Los ia es videda como un defia sinifiante a la roles de la sesos de la tradisiones victorian, en cual femes ia es espetada per labora seria, vive simple, e prea multe. Cresente, femes ia dejeta ideas vea e rijida de sua roles, creante un tipo de "gera cultural" de vea contra joven. En esta modo, flapperes ia es la resulta de cambias sosial, como la direto de vota, e la diminui de la domina de relijio pos la litiga de Scopes.
Ma a la otra lado, la plu de flapperes no ia es interesada en politica. La sufrajetas plu vea, ci ia luta per la diretos de vota, ia regarda flappers como xicas nonseria e en alga modos no meritante la diretos per cual los ia luta.
Petting (caresa sesal) ia deveni plu comun, spesial a la universias. Alga femes joven ia vide lo como un problem, car, an si la omes joven ia espeta un grado de libria sesa en femes, los ia regarda un fem con "esperia" como no bon per sposi. Algas ia vide un difere entre pasion e romantica, sesa e la cor. Ma la petting parties ia produi la funda per un crese de seso ante sposi en la desenios seguente. En la Kinsey Report de 1950, los nota ce, de femes naseda ante 1900, 14% ia atesta ce los ia ave seso ante la eda de 25, e los naseda pos 1900 36% atesta ce los ia copula e esperia orgasma ante sposi. Oji, la majoria de persones ia ave seso ante sposi (77%) e ia ave seso ante un eda de 20 (75%), seguente studias de americanes en 2002.
Fini
[edita | edita la fonte]La moda e stilo de vive de la flapper ia desapare, el a roaring 20s, plen de glamor e stimula, veni a sua fini en la SUA pos la cade de Wall Street de 1929. No plu capas de compra la stilos plu nova, femes ia reveni a sua orlos basa, e la roba de la flapper ia desapare. Un senti plu seria inonda la publica con la Depresa Grande. Un disposa vivosa e edonisme ia es min asetable en la difisilias economia de la desenio de 1930. Cuando la orlos ia comensa alti denova, multe leges ia es introduida per restrinje femas a faldas no plu corta ca 3 ditones (sirca 7.6 cm) supra la talo. Alga femes perde sua emplea per sua capeles corta.
La cambias nesesada par la desenio de 1930 no es fasil. Femes ia es corajida per repara vestes vea, elejes de stofa ia es restrinjeda, robas e faldas no es tan ornada o briliante colorida, stofas artifis ia es usada en loca de stofa rica como seda cual ia es popular en la desenios a ante. En loca, femes debe xerca emplea per sustitui per la omes ci ia vade a la gera. E la laboras nesesada ia clama per la crea e aseta sosial de pantalones per femas en la sosia.