Agnosticisme
Agnosticisme (forma latinida de la parola elinica αγνωστικισμός, agnostikismós, de elinica a-gnoein, no conose) es la nom de un opina filosofial cual suposa ce la esiste o nonesiste de un esente alta o de un dio es nonconoseda o noncomprendable o nonimportante.
A la demanda "Esce Dio esiste?" agnosticisme responde no con "si" o "no", ma con "nonconosable", "nonrespondable" o "nonimportante".
Agnosticisme es un ideolojia cual crede ce la conose umana es limitada a la mundo fisical. La metafisica e la idea sur la esiste o nonesiste de Dio es nonconosable e donce nonusosa.
Agnosticisme es diferente de ateisme car lo no nega la posiblia de la esiste de un prinsipe o de un esente plu alta.
Etimolojia
[edita | edita la fonte]Agnostica (de elinica antica ἀ- (a-), sinifiante 'sin', e γνῶσις (gnōsis) sinifiante 'conose') ia es usada par Thomas Henry Huxley en un parla de la Asosia Metafisical en 1869 per descrive sua filosofia, cual rejeta tota alegas de conose spirital o mistica.
La gidores temprana de la Eglesa ia usa la parola elinica gnōsis (conose) per descrive "conose spirital". Agnosticisme no debe es confusada con vides relijiosa oposante la move relijiosa antica de gnosticisme; Huxley ia usa la terma en un sensa plu larga e astrata. Huxley ia identifia agnosticisme no como un crede ma como un metodo de investiga setica basida sur atestas.
En anios resente, leteratur siensal consernante neurosiensa e psicolojia ia usa la parola per sinifia "nonconosable". En leteratur tecnical e de mercatiste, "agnostica" pote ance sinifia nondepende de alga parametres, pd "plataforma agnostica".