Michel Mayor

Michel Mayor
Gebuertsnumm	Michel Gustave Édouard Mayor
Gebuer	12. Januar 1942 Lausanne
Nationalitéit	Schwäiz
Educatioun	Universitéit vu Genf, Universitéit vu Lausanne
Aktivitéit	Universitéitsprofesser, Astrophysiker, Astronom, Physiker, Fuerscher
Member vun	Académie des sciences, American Academy of Arts and Sciences, National Academy of Sciences, Accademia delle Scienze di Torino, International Astronomesch Unioun

De Michel Gustave Édouard Mayor, gebuer den 12. Januar 1942 zu Echallens am Schwäizer Kanton Vaud ass Professer am Departement fir Astronomie vun der Universitéit Geneva.

Hien huet den éischten extrasolare Planéit am Stärebild Pegasus entdeckt.

Mat Hëllef vu sengem Mataarbechter Didier Queloz konnt hien 1995 mat engem héichopléisende Spektrograph e jupiteränleche Planéit noweisen, deen ëm de Stär Pegasus 51 rotéiert.

D'Existenz vum Pegasus 51b, sou den Numm vum Planéit, gouf den 12. Oktober 1995 vun den US-amerikanesche Wëssenschaftler Geoffrey Marcy a Butler bestätegt a gëllt domat als Meilesteen an der Geschicht vun der Astronomie.

No sengem Physikstudium op der Universitéit Lausanne doktoréiert de Mayor 1971 um Observatoire Genf am Fachberäich Astronomie. Hie bleift, mat Ausnam vu Presenzen um Observatoire Cambridge, am Europäesche Südobservatoire (ESO) am Chile an um Observatoire Hawaii bei där Institutioun beschäftegt. Bis 2005 verfaasst hie méi wéi 300 wëssenschaftlech Publikatiounen.

Vun 1989 bis 1992 presidéiert hien de Wëssenschaftleche Bäirot vun der ESO, vun 1988 bis 1991 d'Kommissioun vun der galaktescher Struktur bei der Internationaler Astronomescher Unioun a vun 1990 bis 1993 déi Schwäizer Gesellschaft fir Astrophysik an Astronomie.

Zanter der Entdeckung vun Pegasus 51b war de Michel Mayor mat sengem Fuerscherteam u ville weideren extrasolare Planéitenentdeckunge bedeelegt. 2013 huet de Queloz zu de Favoritte fir den Nobelpräis gezielt. Hie krut dunn 2019, zesumme mam Didier Queloz, den Nobelpräis fir Physik „fir d'Entdeckung vun engem Exoplanéit, dee ronderëm e sonnenänleche Stär kreest“.

Éierungen

• 1998 Jules-Janssen-Präis
• 1998 Schwäizer Marcel-Benoist-Präis als Unerkennung vu senger Fuerschungsleeschtung an där hir Bedeitung fir dat mënschlecht Liewen.
• 2000 Balzan-Präis fir Instrumentarien an Techniken an der Astronomie an an der Astrophysik
• 2004 Albert Einstein-Medail
• 2005 Shaw Präis zesumme mam Amerikaner Geoffrey Marcy
• 2008 Swiss Astronomy Award
• 2010 Karl-Schwarzschild-Medail
• 2013 En Asteroid gouf no him genannt: (125076) Michelmayor

Kuckt och

Portal Astronomie

Um Spaweck

• (de) Iwwerreechung vun der Albert Einstein-Medail un de Michel Mayor, den 10. Juni 2004