Ingenieur

En Ingenieur oder eng Ingenieurin ass d'Beruffsbezeechnung vun enger Persoun, déi um Gebitt vun der Technik schafft. Si applizéiert wëssenschaftlech a mathematesch Prinzipper, fir Léisunge fir technesch, wirtschaftlech a gesellschaftlech Erausfuerderungen ze fannen. Ingenieure sinn an ville verschiddene Beräicher täteg, dorënner am Bauwiesen (Génie civil op Franséisch), am Maschinnebau, an der Elektrotechnik, an der Informatiounstechnik, am Chimieingenieurwiesen, an der Ëmwelttechnik an a ville weidere Fachgebitter. Si schaffen um Plangen, der Konstruktioun, der Iwwerwaachung an dem Verbessere vu Systemer, Produkter a Prozesser.^[1]

D'Ausbildung zum Ingenieur leeft iwwer en Universitéits- oder Fachhéichschoulstudium. Dozou gehéiert de Studium vun enger vun den Ingenieurswëssenschaften. En ëmfaasst theoretesch a praktesche Inhalter, wéi Mathematik, Physik, Informatik a fachspezifesch Modullen. Nieft dem technesche Fachwësse gëtt och Wäert op d'Entwécklung vu Problemléisungsfäegkeeten, Projektmanagement an Teamaarbecht geluecht. Den Ingenieursstudium gëtt dacks mat engem Bachelor- oder Masterdiplom ofgeschloss, an an e puer Länner ass den Titel vum Diplom-Ingenieur eng weider Qualifikatioun.

Ingenieure schaffen a verschiddene Branchen an Ariichtungen, wéi zum Beispill an der Industrie, a Fuerschungsariichtungen, a Berodungsfirmen, an ëffentleche Verwaltungen an am Bildungssecteur. Si spillen eng wichteg Roll bei der Entwécklung vun innovativen Technologien, der Verbesserung vun der Infrastruktur an dem Sécherstelle vun der Nohaltegkeet. Hir Aarbecht ass vu grousser Bedeitung fir d'wirtschaftlech Entwécklung an den technesche Progrès, well si entscheeden zur Léisung vu komplexe Problemer an der Gestaltung vun der Zukunft bäidroen.

Zu Lëtzebuerg vertrëtt den Ordre des Architectes et des Ingénieurs-Conseils d'Associatioun ënner anerem déi Berodend Ingenieuren (aus dem Bauwiesen).^[2] D'Association nationale des étudiants ingénieurs luxembourgeois (ANEIL) ass d'Vereengegung vun de Lëtzebuerger Ingenieursstudenten.^[3]