Djudeo-portugez

El Djudeo-portugez es una lingua muerta djudeo-romansa ke era avlada por los djudios de Portugal antes del syéklo XVI.

Esta lingua sigió biviendo en las komunitas djudias portugezas (Judeus da Nação Portuguesa), dempues del Egzilio. Para eskrivir la lingua, se uzaban tanto el alefbet ebreo komo el alefbet latino. La lingua resivió una enfluensia grande del djudeo-espanyol, ma la su istorya es diferente, deke los djudios de Portugal no fueron ekspulsados komo los sefardis, ma konvertidos al kristianismo. Munchos de estos Cristãos-Novos (kristyanos muevos o marranos) sigieron biviendo el su djudaismo en sekreto i ansina konservaron la su lingua. Ma dempués, kuando arrivó la Inkisizion enel anyo 1536, estos marranos fuyeron espesialmente a Fransia, los Payises Bashos, el Reyno Unido i Amerika, espesialmente Amerika del Sud. Komo es una lingua muy paresida a la lingua portugeza, esta lingua deshó de ser avlada en Portugal, ma las komunitas portugezas la avlaron asta el empesijo del syéklo XIX. Oy endiya sólo keda komo la baza del papiamento i el saramakano.

Karakterístikas

Djudeo-Portugez	Ivrit	Portugez	Djudeo-Espanyol
cados	kadosh	santo	santo
esnoga	(de orijin grégo)	sinagoga	kal, esnoga
jessiba	yeshiva	escola religiosa	yeshiva
massó	matzot	pão ritual	matsá
misvá	mitzvah	mandamentos	mitsvá
ros	rosh	cabeça	kavesa
rassim	rashim	cabeças	kavesas
rossaná	rosh hashaná	ano-novo judaico	Rosh Ashana
sabá	shabbat	sábado	Shabat
sedacá	tsedaká	caridade	Sedaká
queilá	keilá	congregação	Keilá
quidus	kiddush	bênção sobre o vinho	kiddush
tebá	tevá	plataforma central da sinagoga	tevá

Djudeo-Portugez	Portugez	Djudeo-Espanyol
El Dio	O Deus	El Dio
manim	mãos	manos

Judeo-Portuguese in Jewish Language Research Center
Menasseh Ben Israel, a Halakhic work
Strolovitch, Devon L. (2005) Old Portuguese in Hebrew Script: Convention, Contact, and Convivência. Ph.D. dissertation, Cornell University, Ithaca, NY.
Eskritos en djudeo-portugez, tresladasiyon al inglez i notas