Lèse-majesté

Lèse-majesté, Franca termino qua signifikas "agar neyuste vers majesto", esas ofenso kontre la digneso di regnanta suvereno o kontre stato.

Ta konduto unesme klasifikesis kom kriminal ofenso kontre la digneso di la Republiko di Anciena Roma.  Dum la tarda Romana Imperio, imperiestri eliminis la Republikana kustumi di sua preirinti e komencis identigar la Stato kun sua persono.

Malgre ke legale la princeps civitatis (lua oficala titulo, kun senco, cirkume, 'unesma civitano') nultempe povus divenar suvereno pro ke la republiko nultempe oficale abolisesis, imperiestri deigesis kom divus, unesme posmorte, ma dum la tarda Romana Imperio, dum lia regno.  Deigita imperiestri juis la sama legala protekteso kam la dei di la stato-kulto; kande to remplasesis per kristanismo, esence monarkiala tradiciono ja divenabis bone establisita.

Plu streta koncepti di ofensi kontre Majesto kom ofensi kontre la Krono preponderis en l'europana rejii qui emersis dum la frua mezepokala periodo.  En feudal Europa, ula krimini klasifikesis kom lèse-majesté mem se li ne intence direktesis kontre la Krono.  Exemplo esas kontrafaktar, tale klasifikita pro ke moneto-peci portis l'imajo ed/o blazono dil monarko.

Lor la desaparo di absoluta monarkio en Europa (ecepte en Vatikan-Urbo), lèse-majesté egardesis kom min grava krimino.  Tamen, certena maligna agi qui untempe klasifikesabus kom la krimino lèse-majesté ankore povus persequesar kom trahizo.  Futura republiki qui emersis kom Granda Povi generale ankore klasifikis kom krimino, irga ofenso kontre la maxim alta reprezentanti dil stato.  Ta legi ankore aplikesas anke en monarkii exter Europa, quala moderna Tailando e Kambodja.