Museo Xudeu de Praga

O Museo Xudeu de Praga a carón da Sinagoga española de Praga.

O Museo Xudeu de Praga (en checo: Židovské muzeum v Praze) é un museo de arte xudeu da cidade de Praga (República Checa). No museo expóñense tanto pezas de valor artístico como outras que ilustran a vida e a historia dos xudeus en Bohemia e Moravia. A colección do museo está repartida polas distintas sinagogas do Josefov e é posiblemente, a colección de arte xudeu máis extensa do mundo.

Historia

O Museo Xudeu de Praga foi fundado en 1906 polos historiadores Dr. Hugo Lieben e Dr. Augustin Stein, quen posteriormente se converteu no líder da comunidade xudía de Praga. O obxectivo era preservar os artefactos das sinagogas de Praga demolidas durante renovación urbana do antigo barrio xudeu a principios do século XX. O museo foi pechado o 15 de marzo de 1939 coa ocupación nazi de Bohemia e Moravia. En 1942 o réxime nazi creou o Museo Central Xudeu co obxectivo de mostrar o patrimonio do pobo exterminado cunha colección con obxectos de arte cerimonial xudía de gran valor. A súa fundación foi proposta polo Dr. Stein, que xunto con outros membros especializados do persoal tratou de salvar os obxectos que estaban a ser confiscados polos nazis. Logo de moitas negociacións, o réxime nazi aceptou a proposta de creación do museo, mais guiados por motivos distintos aos dos fundadores do mesmo. Os artefactos foron enviados ao museo procedentes de tódalas comunidades xudías e sinagogas de Bohemia e Moravia.

Logo da segunda guerra mundial, o museo abriu novamente baixo a administración do Consello de Comunidades Xudías de Checoslovaquia, pasando o 4 de agosto de 1950 a transferir a súa administración ao goberno comunista de Checoslovaquia, restrinxíndose as súas actividades de conservación, exhibición e educación.

A caída do réxime comunista en 1989 favoreceu un cambio no status do museo. O 1 de outubro de 1994 os edificios e as coleccións pasaron a ser administrado pola comunidade xudía local e á Federación de Comunidades Xudías da República Checa respectívamente.

Os edificios que albergan o museo no Josefov sufriron danos significativos durante as inundacións europeas de 2002.

Edificios

O museo administra cinco sinagogas, as de Maisel, Pinkas, Klaus, a Sinagoga Española, e a Sinagoga Vella-Nova. Así mesmo, o museo administra o cemiterio xudeu de Praga e os arquivos da comunidade, situados na sinagoga de Smíchov (distrito de Praga).

Galería de edificios

• 
  Sinagoga Maisel.
• 
  Sinagoga Pinkas.
• 
  Sinagoga Klaus.
• 
  Sinagoga Española.
• 
  Sinagoga Vella-Nova.
• 
  Sinagoga Smíchov.
• 
  Vello cemiterio xudeu.

Véxase tamén

Bibliografía

• The Jewish Museum of Prague: A Guide Through the Collections, Hana Volavková, Umělecká beseda, 1948
• Jewish Art Treasures from Prague: The State Jewish Museum in Prague and Its Collections : a Catalogue, Charles Reginald Dodwell, Whitworth Art Gallery, 1920
• The Precious Legacy: Judaic Treasures from the Czechoslovak State Collections, David Altschuler, Vivian Mann, Simon & Schuster 1983

Ligazóns externas

• Sitio web do Museo Xudeu de Praga (en checo) (en inglés)
• Sitio web da Comunidade Xudía de Praga (en checo) (en inglés) (en hebreo)
• synagogue.cz (en varios idiomas)