Ghada Shouaa
| Biografía | |
|---|---|
| Nacemento | 10 de setembro de 1972  (52 anos)Mharda, Siria (en)  |
| Altura | 187 cm |
| Peso | 63 kg |
| Actividade | |
| Ocupación | atleta |
| Deporte | atletismo |
| Disciplina deportiva | héptatlon |
| Participou en | |
| 1996 | Xogos Olímpicos de 1996 |
| Sitio web | shouaa.com |
  | |
Ghada Shouaa (en árabe: غادة شعاع), nada en Mhardeh o 10 de setembro de 1972, é unha ex-heptatleta siria. Nos Xogos Olímpicos de 1996 pasou á historia como a primeira e única deportista siria en gañar unha medalla de ouro olímpica.
Traxectoria
[editar | editar a fonte]Nacida na pequena cidade siria de Mahardah na gobernación de Hama, o primeiro deporte que practicou foi o baloncesto.[1] Xogou varios anos na selección siria, pero despois decidiu competir en atletismo. Fixo o seu primeiro héptatlon en 1991, e rapidamente conseguiu a clasificación para o Campionato do Mundo de 1991 en Toquio, onde quedou en última posición.[1] Concluíu a súa primeira tempada de atletismo cunha medalla de prata nos campionatos asiáticos.
Ao ano seguinte participou por primeira vez nuns Xogos Olímpicos, en Barcelona, onde competiu lesionada e finalizou na 25ª posición. A súa explosión non chegou até 1995, cando gañou o importante meeting de Götzis, cunha marca de 6715 puntos. Isto colocouna como unha das favoritas no Mundial de 1995, celebrado en Gotemburgo. Despois de que a outra favorita, Sabine Braun, caese lesionada, Shouaa gañou o título cunha marxe cómoda.[1]
A tempada seguinte gañou de novo o meeting de Götzis, establecendo, con 6942 puntos, un récord asiático que aínda non foi superado. Nos Xogos Olímpicos de Atlanta, tres meses despois, confirmou a súa condición de mellor heptatleta do momento, gañando a primeira e única medalla de ouro olímpica da historia de Siria.[1] Ao seu regreso a Siria foi recibida en Damasco por máis de 100.000 persoas.[2]
Unha grave lesión arruinou a súa seguinte tempada, e non puido repoñerse totalemente ata 1999, cando quedou terceira no Campionato do Mundo por detrás de Eunice Barber.[1] Shouaa intentou defender o seu título olímpico en Sydney 2000, pero volveuse lesionar e nin sequera rematou a primeira proba.[1] Despois desta decepción, decidiu retirarse do atletismo.
Durante unha visita a Siria en 2013 ou 2014 en plena guerra civil, Shouaa apareceu nunha imaxe cunha metralleta pesada mentres acompañaba ás Forzas de Defensa Nacional, unha rama das Forzas Armadas Sirias, e deu o seu apoio ao Exército Árabe Sirio.[3]
Notas
[editar | editar a fonte]- ↑ 1,0 1,1 1,2 1,3 1,4 1,5 "Ghada Shouaa". damascus-online.com (en inglés). Arquivado dende o orixinal o 27 de setembro de 2007. Consultado o 27 de outubro de 2021.
- ↑ "La Syrienne Ghada Shouaa, reine oubliée de l’heptathlon". Le Monde (en francés). 4 de agosto de 2020. Consultado o 27 de outubro de 2021.
- ↑ "بعد أن " طفشها " نظام الأسد .. غادة شعاع تتحول من بطلة أولمبية إلى " رامية دوشكا " في الدفاع الوطني ( صور )". aksalser.com (en árabe). Arquivado dende o orixinal o 03 de xaneiro de 2018. Consultado o 27 de outubro de 2021.
Véxase tamén
[editar | editar a fonte]Ligazóns externas
[editar | editar a fonte]- Ghada Shouaa no sitio web oficial da Asociación Internacional de Federacións de Atletismo (en inglés).
- Ghada Shouaa no sitio web oficial do Comité Olímpico Internacional (en inglés).
| Control de autoridades |
|
|---|
