Magnetismo

O magnetismo é unha propiedade física relacionada cos campos magnéticos, así como as interaccións entre imáns naturais, é un fenómeno consistente na atracción e repulsión de forzas saídas de obxectos, que se atraen ou repelen. Hai algúns materiais que presentan propiedades magnéticas detectables como o níquel, o ferro, o cobalto e as súas aliaxes. Con todo, todos os materiais son influídos, de maior ou menor xeito, pola presenza dun campo magnético.

Ata o século XIX foi considerado como unha parte independente da física, limitándose nese tempo a analizar e experimentar coas interaccións entre imáns. Unha aplicación moi importante deste fenómeno, dado que a Terra funciona tamén como un imán, foi o compás, que non é máis que un imán que se orienta debido ó campo magnético da Terra.

O magnetismo estuda os campos magnéticos, aquí representadas as liñas de forza magnéticas dun imán de barra, producidas por limaduras de ferro sobre papel.

A zona onde se produce un efecto magnético chámase campo magnético. Así, o efecto magnético terrestre produce o campo magnético da Terra.

O magnetismo tamén ten outras manifestacións físicas, particularmente como un dos dous compoñentes da radiación electromagnética, como por exemplo, a luz. O magnetismo pode mesmo producir efectos interplanetarios. Así, o magnetismo solar, variable cun ciclo de 22 anos, produce efectos visibles en forma de diferente número de manchas solares, e outros, como a maior ou menor intensidade de radiación, que pode ser perigosa para os astronautas ou mesmo para equipos na superficie terrestre.

Unidades

Unidades do SI relacionadas co magnetismo

• Tesla [T] = unidade de campo magnético.
• Weber [Wb] = unidade de fluxo magnético.
• Ampere [A] = unidade de corrente eléctrica, que xera campos magnéticos.

Outras unidades

• gauss, abreviado como G, é a unidade CGS de indución magnética (B).
• Oersted, é a unidade CGS de campo magnético.
• Maxwell, é a unidade CGS de fluxo magnético.

Véxase tamén

Outros artigos

• Superparamagnetismo

---

Este artigo sobre física é, polo de agora, só un bosquexo. Traballa nel para axudar a contribuír a que a Galipedia mellore e medre.  Existen igualmente outros artigos relacionados con este tema nos que tamén podes contribuír.

---