Jenny McCarthy
Jenny McCarthy (folút: Jennifer Ann McCarthy; Chicago, 1 novimber 1972) is in Amerikaansk presintatrise, aktrise, model, komediënne, publisiste, senarioskriuwster en aktiviste fan mingd Iersk-Dútsk-Poalsk etnysk komôf. Hja waard oarspronklik yn 1993 bekend as neakenmodel yn 'e Playboy en waard letter beneamd ta Playmate fan it Jier. Neitiid wist se har bekendheid as neakenmodel om te setten yn in karriêre op 'e tillefyzje en it wite doek. McCarthy stiet fierders ek bekend as aktiviste tsjin it faksinearjen fan bern, mei't dat neffens har autisme feroarsaakje soe. Oer dat ûnderwerp en oanbesibbe matearje hat se ferskate boeken publisearre.
Jenny McCarthy | ||
![]() | ||
![]() | ||
persoanlike bysûnderheden | ||
echte namme | Jennifer Ann McCarthy | |
nasjonaliteit | ![]() | |
berne | 1 novimber 1972 | |
berteplak | Chicago (Illinois) | |
etnisiteit | ![]() ![]() ![]() | |
wurkpaad | ||
wurksum as | presintatrise, aktrise, model, neakenmodel, komediënne, publisiste, senarioskriuwster | |
medium | tillefyzje, film | |
wurksum by | MTV, ABC | |
bekend fan | Playboy The View | |
jierren aktyf | 1993 – no | |
offisjele webside | ||
gjint |
Libben en karriêre
bewurkje seksjeJonkheid en oplieding
bewurkje seksjeMcCarthy waard yn 1972 berne yn Chicago, yn 'e steat Illinois, yn in roomsk gesin fan mingd Iersk, Dútsk en Poalsk etnysk komôf. Hja groeide op yn Evergreen Park, in foarstêd fan Chicago, en yn West Elsdon, in súdwestlike bûtenwyk fan Chicago. Har heit, Dan McCarthy, wie foarman yn in stielfabryk wie, en har mem Linda, wie in húsfrou en parketwacht. McCarthy wie de twadde fan fjouwer dochters yn it gesin, mei susters dy't fan Lynette, Joanne en Amy hjitte. Joanne is in earder profesjoneel basketbalster. Aktrise Melissa McCarthy is in folle nicht fan Jenny McCarthy.
McCarthy folge de middelbere skoalle oan 'e Mother McAuley Liberal Arts High School yn Chicago, en wie cheerleader oan 'e Brother Rice High School en de St. Laurence High School. Nettsjinsteande it feit dat cheerlearders yn 'e regel ta de populêrste famkes op in skoalle hearre, hat McCarthy harsels yn har tinerjierren omskreaun as "in ferskoppeling", dy't geregeldwei narre waard troch har klasgenoaten. Nei't se de middelbere skoalle mei goed gefolch trochrûn hie, studearre se twa jier oan 'e Universiteit fan Súdlik Illinois, yn Carbondale.
Karriêre
bewurkje seksjeYn 1993, doe't se 21 jier wie, posearre McCarthy yn ruil foar $20.000 (omrekkene yn 2016 hast $33.000) foar in neakenreportaazje yn it manljusblêd Playboy. Hja waard de Playmate fan de Moanne oktober, wêrby't har it personaazje fan it naïve roomske skoalfamke taparte waard. Dat foel net goed yn har roomske buert, dêr't har hûs mei aaien bekûgele waard, har jongere suskes op skoalle narre waarden en har it leksum lêzen waard troch ferskate muoikes dy't non wiene. Dat se neitiid ta Playmate fan it Jier útkeazen waard en in salaris fan $100.000 útbetelle krige, sil foar McCarthy lykwols in protte goed makke hawwe.
Neitiid ferfear McCarthy nei Los Angeles, dêr't se in hoart it muzykprogramma Hot Rocks presintearre op 'e betelstjoerder Playboy TV, wêryn't pikante fideoklips fertoand waarden. Yn 1995 waard McCarthy troch de muzykstjoerder MTV frege om it programma Singled Out te presintearjen. Dat waard in grut súkses, wêrnei't de Playboy har frege foar in nije neakenreportaazje. Datselde jiers hie McCarthy ek har earste filmroltsje, as ferpleechkundige yn Thing to Do in Denver When You're Dead. Yn 1996 wist McCarthy in lyts roltsje yn 'e komeedzjesearje The Stupids te bemachtigjen, wêrnei't se yn 1997 har eigen programma mei komyske sketches op MTV krige, mei as titel The Jenny McCarthy Show. Dy wie súksesfol genôch dat se letter datselde jiers in eigen komeedzjesearje op 'e Amerikaanske nasjonale stjoerder NBC taparte krige, mei as namme Jenny. Datselde jiers stie se ek wer yn 'e Playboy, diskear ek op 'e omslach fan 'e septimberedysje. Boppedat brocht se in autobiografy út, mei as namme Jen-X: Jenny McCarthy's Open Book.
Har earste grutte filmrol hie McCarthy yn 1998, as tsjinspylster fan Trey Parker en Matt Stone yn 'e komeedzje BASEketball. Yn 2000 hie se in rol yn 'e horrorfilm Scream 3, en yn 2003 wie se mei û.m. har kollega-Playmate Pamela Anderson te sjen yn 'e horrorparody Scary Movie 3. Twa jier letter, yn 2005 spile McCarthy in haadrol yn 'e film Dirty Love, dêr't se sels it senario foar skreau en dy't se ek produsearre. De film waard regisearre troch har doetiidske man John Asher. Dirty Love waard net goed ûntfongen, en yn 2006 ûntfong McCarthy der de Raspberry Award foar minste aktrise, minste senario en minste film foar, wylst Asher de Raspberry Award foar minste regisseur taparte krige.
Underwilens hie McCarthy rollen hân yn in ferskaat oan tillefyzjesearjes, lykas Stacked, Charmed, The Drew Carey Show, Wings, Fastlane, Just Shoot Me! en Two and a Half Men. Dêrnjonken wurke se stimaktrise mei oan it trêde seizoen fan 'e Kanadeeske tekenfilmsearje Tripping the Rift. Fierders hold McCarthy ek de bân mei Playboy oan, sawol as neakenmodel as yn oare hoedanichheden. Yn jannewaris 2005 stie se wer op 'e omslach fan it blêd, en wie se binnenyn te besichtigjen by in neakenreportaazje dy't makke wie yn Graceland, de filla fan Elvis Presley yn Memphis. Fierders lei McCarthy har sels ek ta op fotografy, en wie se nei Carmen Electra de twadde frou dy't in neakenreportaazje makke (fan it model Jennifer Madden) foar de Playboy Cyber Club. McCarthy har jongere suster Amy wurke ek as neakenmodel foar Playboy, en wie yn Cyber Girl fan de Wike yn 'e wike fan 27 septimber 2004 en Cyber Girl fan de Moanne yn jannewaris 2005.
Yn 2007 spile McCarthy mei û.o. Chelsea Handler en Leah Remini yn in online-searje fan fiif ôfleverings, mei as titel In the Motherhood. Ek wurke se mei oan twa fideospultsjes, wêrby't se Kari Wührer ferfong yn Command and Conquer: Red Alert 3, en as ynstruktrise yn it fitnessfideospultsje Your Shape Featuring Jenny McCarthy. Op âldjiersdei 2010 wie McCarthy ferslachjouster op Times Square yn New York foar it programma Dick Clark's New Year's Rockin' Eve, op 'e stjoerder ABC. In jier letter wurke se wer mei oan dat programma, en tute se om tolve oere op âldjiersjûn in Newyorkske plysjeman dy't tafallich tichteby har stie. Op 31 desimber 2012 wie se fannijs fan 'e partij, en tute se in kadet fan 'e Amerikaanske Keapfardij Akademy.
Yn 'e simmer fan 2012 presintearre McCarthy it twadde seizoen fan it programma Love in the Wild. Yn augustus fan dat jier stie se wer op 'e omslach fan 'e Playboy, om't se foàr har fjirtichste jierdei op 'e nij foar in fotoreportaazje yn dat neakenblêd posearje woe. Nei santjin gastoptredens waard McCarthy yn july 2013 oannommen as fêste mei-presintatrise fan tillefyzjefeteraan Barbara Walters yn it praatprogramma The View, op 'e stjoerder ABC, wêrby't se Joy Behar ferfong. Dat wurk die McCarthy in jier lang, oant se yn 'e simmer fan 2014 tegearre mei in oare mei-presintatrise, Sherri Shepherd, by The View weigie. Der waard fan grute dat ABC McCarthy har kontrakt net ferlinge hie fanwegen har aktivistyske aktiviteiten, mar yn in fraachpetear ûntstried McCarthy sels dat se ûntslein wie. Fuort neitiid sette se útein as presintatrise fan it programma Dirty, Sexy, Funny with Jenny McCarthy, op 'e stjoerder SiriusXM.
Priveelibben
bewurkje seksjeMcCarthy hie fan 1994 oant 1998 in relaasje mei ympressario Ray Manzella. Ein 1998 begûn se om te gean mei akteur en regisseur John Mallory Asher. Mei him ferloofde se har yn jannewaris 1999, en op 11 septimber fan dat jier trouden se. Harren soan Evan Joseph Asher waard op 18 maaie 2002 berne.
Nei't by har soan yn maaie 2005 autisme fêststeld waard, ûntjoech McCarthy har ta in foaroansteand aktiviste op it mêd fan 'e maatskiplike akseptaasje fan autisten. Dêrnjonken hat droech se aktyf de teory út dat autisme yn in protte gefallen feroarsake wurdt troch faksinaasjes, en rôp se yn 'e ûnderskate boeken dy't se oer dat ûnderwerp skreau alle Amerikaanske âlden op om faksinaasjes foar harren bern safolle mooglik te wegerjen. Dat kaam McCarthy op in protte krityk fan oare âlden en út 'e hoeke fan medyske ekspêrs te stean.
McCarthy en Asher skieden yn septimber 2005, wêrnei't McCarthy yn desimber fan dat jier in relaasje krige mei akteur Jim Carrey, hoewol't dat pas yn juny 2006 bekend waard. Yn april 2008 makke McCarthy yn it praatprogramma fan Ellen Degeneres iepenbier dat sy en Carrey gearwennen en der neat foar fielden om te trouwen. Twa jier letter, yn april 2010 giene se útinoar. Yn july 2013 krige McCarthy in relaasje mei Donnie Wahlberg, de broer fan akteur Mark Wahlberg, mei wa't se har begjin 2014 ferloofde, wêrnei't se op 31 augustus fan dat jier trouden.
Publikaasjes
bewurkje seksje- 1997 – Jen-X: Jenny McCarthy's Open Book (autobiografy)
- 2005 – Belly Laughs: The Naked Truth about Pregnancy and Childbirth
- 2006 – Baby Laughs: The Naked Truth about the First Year of Mommyhood
- 2007 – Life Laughs: The Naked Truth about Motherhood, Marriage, and Moving On
- 2007 – Louder than Words: A Mother's Journey in Healing Autism
- 2008 – Mother Warriors: A Nation of Parents Healing Autism Against All Odds
- 2009 – Healing and Preventing Autism (mei dr. Jerry Kartzninel)
- 2010 – Love, Lust & Faking It: The Naked Truth About Sex, Lies, and True Romance
- 2012 – Bad Habits: Confessions of a Recovering Catholic
Keppelings om utens
bewurkje seksjeBoarnen, noaten en/as referinsjes: | ||
Foar boarnen en oare literatuer, sjoch ûnder: References, op dizze side.
|