Vlissingen

Vlissingen; Vlissingen; Vlissienge
	Herbehereetako udalerria
	Irudi gehiago
Administrazioa
Estatu burujabe	Herbehereetako Erresuma
Herrialdea	Herbehereak
Probintzia	Zeelanda
Alkatea	Bas van den Tillaar (en)
Izen ofiziala	Vlissingen
Jatorrizko izena	Vlissingen; Vlissienge
Posta kodea	4380–4389
Herriburua	Vlissingen (en)
Geografia
Koordenatuak	51°27′N 3°35′E / 51.45°N 3.58°E
Azalera	345 km²
Altuera	1 m
Mugakideak	Middelburg (en) , Borsele, Terneuzen, Itsas zabal, Veere eta Sluis
Demografia
Biztanleria	44.358 (2021eko urtarrilaren 1a); −2 (2020)
Dentsitatea	129 bizt/km²
Etxebizitzak	22.067
Informazio gehigarria
Sorrera	1247
Telefono aurrizkia	0118
Ordu eremua	UTC+01:00
Hiri senidetuak	Deal (Kent) eta Ambon
	vlissingen.nl

Vlissingen^[1] (entzun^ⓘ) Herbehereetako Zeelanda probintziako herria da. 2010eko urtarrilaren 1eko erroldaren arabera, herriak 44.608 biztanle zituen. Probintzian biztanle gehien dituen herria da Terneuzenen atzetik. Bertan herrialdeko bigarren porturik garrantzitsuena dago, Westerschelde ibaiaren bokaletik gertu.

Inguru naturala eta kokapena

Vlissingen Herbehereetako hego-mendebaldean dagoen herria da, hegoaldean Westerschelde ibaiarekin egiten du muga, ekialdean Borselerekin, iparraldean Middelburgekin eta ipar-mendebaldean Veererekin.

Geografia

Vlissingen Walcheren uhartearen hegoaldeko muturrean dago, Scheldt eta Ipar itsasoaren artean. Erliebe laua eta hondartza luzeak paisaia osatzen dute. Udalerriaren ipar-mendebaldean dago udalerriko punturik garaiena, Ipar itsasoaren ondoko dunetan.

Vlissingengo hondartzetara milaka turista etortzen dira urtero, batez ere Alemaniatik etorritakoak. Hondartzarik ezagunena Badstrand dago, herriko pasealeku edo "Boulevarraren" ondoan etxebizitza eraikinik garaienak dauden gunean. Nollestrand hondartza Windorgel eta Nollebosch bitartean dago mendebaldeko dunetara bidean.

Auzoak

Vlissingen	33.000
Oost-Souburg	10.500
West-Souburg	1.000
Ritthem	500

Klima

Vlissingenek klima atlantiar hezea dauka. Prezipitazioak ugariak dira urte osoan zehar eta udako azken asteetan ekaitzak izan daitezke. Orokorrean herrialdearen gainontzean baino euri gehiago jausten da urtero (700 eta 800mm inguru), baina kopuruak oso aldakorrak dira urte batetik bestera. Mendebaldeko eta ipar-mendebaldeko haizeak jotzen duenean euri gehiago egiten du ipar-ekialde edo ekialdetik jotzen duenean baino.

Tenperaturak nahiko epelak dira eta neguan elur gutxien egiten duen Herbehereetako gunea da, batez beste 15 egun urtero. Dena den, prezipitazioak bezala aldakorra da elur egunen kopurua urtetik urtera, 2009 eta 2010era bitarteko neguan esaterako 40 egunetan jausi zen elurra, Europa mendebalde osoan izandako hotz bolada iraunkorrak eraginda. Uda garaian tenperaturak 20 eta 25 gradu bitartean mantentzen dira eta noizbehinka termometroa 30 gradura ere hurbiltzen da.

Vlissingengo batez besteko ezaugarri klimatikoak^[2]
Hilabete	Urt	Ots	Mar	Api	Mai	Eka	Uzt	Abu	Ira	Urr	Aza	Abe	Urtea
Batez besteko tenperatura maximoa (°C)	6	6	9	13	17	19	21	22	19	15	10	7	14
Batez besteko tenperatura minimoa (°C)	2	2	4	6	10	13	15	15	13	10	6	3	8
Prezipitazioak (mm)	59	48	51	39	53	63	64	74	69	76	78	69	744
Iturria: Weer.nl webgunea

Historia

Duen kokapen estrategikoa dela eta, Vlissingen portu garrantzitsuena izan da historian zehar. Ipar itsasorako igarobidea izanik, XVII. mendean Herbehereetako Ekialdeko Indietako konpainiaren ontzien abiapuntua izan zen.

Hiri eskubideak 1315ean jaso zituen.

Ekonomia

Vlissingengo portua Terneuzengoarekin batera Zeeland Ports izeneko elkartearen barruan daude, urtero 33 milioi tona zama mugitzen dituzte. Portua ekialderantz garatzen joan da Scheldt ibaian barrena eta gaur egun gai solidoak, kontainerrak eta petroliotik eratorritakoak jasotzen dituzten terminalak daude. Etorkizunean portua gehiago handitzeko proiektuak daude, batez ere, kontainerren garraiorako terminal berriak eraikitzeko eta horrela Anberesko portuari konpetentzia egiteko. Izan ere, Vlissingengo portura sakonera handiagoko itsasontziak hel daitezke.

Portuaz gain, hirian gerraontziak eraikitzen dituen Damen ontziola dago, antzina zeuden ontzioletatik geratzen den bakarra.

Garraiobideak

2003an Vlissingen eta Breskens herriak itsasoz elkartzen dituen Veolia enpresa frantziarraren ferry zerbitzua martxan jarri zen. Uda garaian ferryak zerbitzu gehiago eskaintzen ditu inguruetara etortzen diren milaka turistengatik.

1990eko hamarkadara arte Vlissingen eta Erresuma Batua batzen zituen ferry zerbitzua ere izan zen.

Trena

Herbehereetako tren garraio enpresa nazionalaren bi lineek herria zeharkatzen dute, Vlissingen Roosendaal eta Amsterdamekin elkartuz. Herrian bi geltoki daude, bata ´´Vlissingen´´ izenekoa, herriaren hegoaldean dago, ferry geltoki eta portu zaharretik gertu, eta bigarrena Oost Souburg auzoan dago, Middelburgerako kanalaren ondoan.

Oost Souburgeko geltokia Herbehereetan hegoalderago dagoen tren geltokia da.

Autobusa

Conexxion autobus konpainiaren hiru lineek Vlissingen inguruko herriekin batzen dituzte, 56. 57. eta 58. lineek Vlissingen eta Middelburg elkartzen dituzte ordu erdiko maiztasunarekin.

60. lineak Vlissingen kanpoaldean dagoen unibertsitate eta institutoak Terneuzenekin batzen ditu, baina egunean bi zerbitzu baino ez daude, ikasleak goizean eskoletara joan eta arratsaldean eskoletatik bueltatzeko.