Katharine Graham

Katharine Graham
(1975) Irudi gehiago
Bizitza
Jaiotzako izen-deiturak	Katharine Meyer
Jaiotza	New York, 1917ko ekainaren 16a
Herrialdea	Ameriketako Estatu Batuak
Heriotza	Boise, 2001eko uztailaren 17a (84 urte)
Hobiratze lekua	Oak Hill Cemetery (en)
Heriotza modua	istripuzko heriotza: zaldi gainetiko erortzea
Familia
Aita	Eugene Meyer
Ama	Agnes E. Meyer
Ezkontidea(k)	Phil Graham  (1940 -  1963)
Seme-alabak	ikusi Lally Weymouth Donald E. Graham
Haurrideak	ikusi Florence Meyer
Hezkuntza
Heziketa	Chicagoko Unibertsitatea Vassar College (en)
Hizkuntzak	ingelesa
Jarduerak
Jarduerak	argitaratzailea, idazlea, kazetaria, enpresaburua, editorea eta arte bildumagilea
Jasotako sariak	ikusi Elijah Parish Lovejoy Award  (1973) Pulitzer Saria Biografia edo Autobiografia  (1998) Four Freedoms Award – Freedom Medal  (1997) Emakumeen Arrakastaren Saloi Nazionala  (2002) Library of Congress Living Legend Askatasunaren Domina Presidentziala International Press Institute World Press Freedom Heroes  (2000) Courage in Journalism Award  (1994) Fellow of the American Academy of Arts and Sciences Ladies' Home Journal Women of the Year  (1973) Walter Cronkite Award for Excellence in Journalism  (1987)
Kidetza	Arteen eta Zientzien Ameriketako Estatu Batuetako Akademia

Katharine Graham (New York, 1917ko ekainaren 16a - Boise, Idaho, 2001eko uztailaren 17a) estatubatuar kazetaria eta hedabideen enpresaburua izan zen.

Estatu Batuetako berreraikuntza ekonomikoaren oinarri nagusietako bat izan zen Eugene Isaac Meyer aberatsaren alaba zen. Politika Zientzietako ikasketak egin zituen Chicagoko Unibertsitatean. 1940an, Philip Leslie Graham legelariarekin ezkondu zen. Urte batzuk geroago, Bigarren Mundu Gerra bukatuta, Philip Leslie Graham Washington Post egunkariaren zuzendari bihurtu zen. Handik aurrera, senar-emazteak buru-belarri murgildu ziren egunkariko langintzan. 1963an, Graham hil zenean, Katharine Grahamek hartu zuen senarraren lekukoa. Washington Post Companyko zuzendari gisa, egunkariko ildoa aldatzen saiatu zen, eta bi eskakizun egin zituen: batetik, jarrera politiko zabalagoa hartzea, eta, bestetik, informazio-iturriak berrikustea, edozein gai argitara atera baino lehen. 1960ko hamarraldiaren erdialdean, Benjamin Bradleek egunkariko zuzendaritza bere gain hartu zuenean lortu zen hori guztia. 1973an, Newsweek aldizkaria erosi zuen, eta baita Bowater Mersey Paper Company paper-fabrika ere, taldeko egunkariak eta kazetak paperez hornitu ahal izateko. Mugimendu handiko urteak izan ziren haiek, eta, besteak beste, egunkariak Pentagonoko paperen eta Watergate kasuen berri eman zuen. 1979an, Katharinek bere seme Donalden eskuetan utzi zuen egunkariaren zuzendaritza, ez ordea Washington Post Companyrena, ez behintzat 1991. urtera arte. 1998an, biografia onenaren Pulitzer Saria irabazi zuen bere Historia pertsonala liburuarengatik; urte hartako liburu salduenetako bat izan zen Estatu Batuetan.

Erreferentziak

• Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/26 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.

• Datuak: Q435203
• Multimedia: Katharine Graham / Q435203