Tosaíochta straitéiseacha a shocrú
Is ar bhonn comhpháirteach a cheaptar mórstraitéis pholaitiúil an Aontais Eorpaigh. Is iad na rannpháirtithe sa phróiseas sin: Parlaimint na hEorpa, an Chomhairle Eorpach, Comhairle an Aontais Eorpaigh agus an Coimisiún Eorpach.
Go háirithe, cuireann an Chomhairle Eorpach treo agus spriocanna an Aontais ar fáil do thréimhse 5 bliana i gClár Oibre Straitéiseach an Aontais.
Thairis sin, gach cúig bliana, i dtosach théarma oifige nua an Choimisiúin, beartaíonn Uachtarán an Choimisiúin tosaíochtaí polaitiúla an Choimisiúin don téarma oifige sin.
Gach bliain, san aitheasc ar Staid an Aontais, déanann Uachtarán an Choimisiúin an méid atá bainte amach ag an gCoimisiún le linn na bliana roimhe sin a chur i láthair agus a phlé le Parlaimint na hEorpa agus fógraíonn sé na príomhthionscnaimh atá beartaithe don bhliain atá le teacht. Déantar na tionscnaimh sin a chomhroinnt freisin le hUachtarán Pharlaimint na hEorpa agus le hUachtaránacht rothlach na Comhairle i ‘litir intinne’, mar a thugtar uirthi.
Bunaithe ar an méid sin agus ar na tosaíochtaí uileghabhálacha 5 bliana, leagtar amach plean gníomhaíochta don chéad bhliain féilire eile i gclár oibre an Choimisiúin. Léirítear sa phlean sin an chaoi a gcuirfear na tosaíochtaí polaitiúla i bhfeidhm go praiticiúil.
Tríd an bhfadbhreathnaitheacht straitéiseach, féachann an Coimisiún freisin le léargais amach anseo a leabú ina cheapadh beartas, ina phleanáil straitéiseach agus ina ullmhacht.
Pleanáil de réir na hArd-Stiúrthóireachta
Cuireann Ard-Stiúrthóireachtaí an Choimisiúin pleananna straitéiseacha agus pleananna bainistíochta le chéile ina léirítear conas a chuirfidh siad le tosaíochtaí an Choimisiúin agus ina leagtar amach cuspóirí agus táscairí soiléire monatóireachta agus tuairiscithe.
Ullmhaíonn ard-stiúrthóireachtaí an Choimisiúin measúnú tionchair do gach mórthionscnamh reachtach agus gach mórthionscnamh lena sainmhínítear beartais. Déantar anailís ar éifeachtaí eacnamaíochta, comhshaoil agus sóisialta dóchúla na dtograí.
Tugtar cothrom le dáta go rialta liosta de thionscnaimh an Choimisiúin atá beartaithe agus liosta de thionscnaimh an Choimisiúin atá glactha agus seoltar chuig institiúidí eile an Aontais Eorpaigh iad chun cabhrú leo sin a gcuid gníomhaíochtaí féin a eagrú.
Beartais a cheapadh agus a chur chun feidhme
Tá beartais an Aontais ceaptha fónamh a dhéanamh do shaoránaigh, do ghnólachtaí agus do ghrúpaí eile san Aontas. A bhuí le huirlisí rialála níos fearr cinntítear gur ar fhianaise agus ar an dea-chleachtas is fearr dá bhfuil ann a bhunaítear beartais nua.
Déanann an Coimisiún Eorpach beartais an Aontais Eorpach a fhorbairt agus a chur chun feidhme tríd an méid seo a leanas a dhéanamh:
- tograí reachtacha a chur faoi bhráid Pharlaimint na hEorpa agus Chomhairle an Aontais Eorpaigh
- cuidiú leis na Ballstáit reachtaíocht an Aontais a chur chun feidhme
- buiséad an Aontais a bhainistiú agus maoiniú a leithdháileadh
- deimhin a dhéanamh de go gcomhlíontar dlí an Aontais i gcomhar leis an gCúirt Bhreithiúnais
- ionadaíocht a dhéanamh don Aontas lasmuigh den Eoraip, i gcomhar leis an tSeirbhís Eorpach Gníomhaíochta Seachtraí, is é sin seirbhís taidhleoireachta an Aontais
Buiséad an Aontais Eorpaigh
Is é buiséad an Aontais an uirlis a chuireann ar chumas an Aontais a thosaíochtaí beartais a bhaint amach agus infheistíocht a dhéanamh i dtionscadail mhórscála nach bhféadfadh Ballstáit den Aontas a mhaoiniú astu féin. Trí acmhainní a chomhthiomsú, cruthaíonn buiséad an Aontais breisluach agus neartaíonn sé geilleagar agus seasamh geopholaitiúil na hEorpa.
Buiséad an Aontais faoi lán seoil
Buiséad fadtéarmach an Aontais
An tAontas Eorpach mar iasachtaí - an caidreamh le hinfheisteoirí
Tuarascálacha
Déanann an Coimisiún a chuid oibre a leagan amach, agus tuairisciú ar an obair sin, de réir timthriall bliantúil dá nglaoitear an timthriall um pleanáil straitéiseach agus cláreagrú. Foilsíonn an Coimisiún tuarascálacha go rialta a eascraíonn as gach timthriall.
Ag deireadh na bliana airgeadais, ullmhaíonn gach Ard-Stiúrthóireacht de chuid an Choimisiúin tuarascáil bhliantúil ar ghníomhaíochtaí maidir leis an gcaoi ar éirigh leo a gcuid cuspóirí a bhaint amach. Déantar na tuarascálacha sin a thiomsú in aon tuarascáil sintéise amháin a chuirtear ansin chuig Parlaimint na hEorpa agus an Chomhairle. Ón mbliain 2016 i leith, áireofar an tuarascáil sintéise ina cuid den tuarascáil bhliantúil bhainistíochta agus feidhmíochta ar bhuiséad an Aontais.
Tuarascálacha bliantúla ar ghníomhaíochtaí
Tuarascálacha bliantúla ar bhainistíocht agus ar fheidhmíocht
Meastóireacht
Déanann an Coimisiún meastóireacht leanúnach ar bheartais an Aontais féachaint an bhfuil siad ag fónamh do ghnólachtaí agus do shaoránaigh na hEorpa. Sna meastóireachtaí sin, scrúdaítear na beartais i dtéarmaí éifeachtachta, éifeachtúlachta, ábharthachta, comhleanúnachais agus breisluacha an Aontas. Is le treochláir mheastóireachta a chuirtear meastóireachtaí in iúl don phobal.