Ghjacumu Santu Versini
Ghjacumu Santu Versini (1867-1922) hè statu un autore è pueta in lingua corsa.
Biugrafia
[mudificà | edità a fonte]
Ghjacumu Santu Versini hè natu in Marignana u 10 aprile di u 1867. Era u figliolu di Ghjuvan' Dumenicu Versini (1838-1927) è di Livia Maria Antonini (1845-1892). S'hè maritatu in Aiacciu u 28 d'aprile di u 1885 incù Maria Nunzia Orsini detta Clementina. Incun ella ebbi un figliolu: Ghjuvan' Dumenicu (1885-1887). Si rimaritò dopu, u 28 di dicembre di u 1894, in Marignana incù Saveria Furtunata Versini (1869-1956).
Hà fundatu a Cyrnos-revue in u 1911 è ni fù u direttore durante parechji anni.
Ghjacumu Santu Versini hè statu dinù u fundatore incù Saveriu Paoli di a rivista A Cispra di marzu 1914. Ùn hè statu publicatu cà un solu numeru di a rivista, chì subitu dopu hè vinuta a guerra. Ma A Cispra publicò puesie di prima trinca cum'è quelle di l'autore (in particulare M'innamoru o Neve) è ebbi dopu un'influenza prufonda annantu à U Riacquistu, prumuvendu in particulare u cuncettu di soluzione pulitica à u prublemu corsu è quellu d'autonomia par a Corsica.
Ghjacumu Santu Versini hà cullaburatu dopu à u ghjurnale aiaccinu "L'Eveil" da dicembre di u 1921 à ottobre di u 1922. U cugnome di Ghjacumu Santu Versini era "Buscagliolu". Di prufissione, hè statu stitutore in Marignana.
Hè cunsideratu cum'è un pueta corsu di prima trinca. Com'ellu a dice Julian Mattei[1]: "Trova omu in a so opera una scrittura delicata assai capace à dì u mondu cù una sensibilità ricercata cum’è ind’è a so puesia "M'innamoru".
Ghjacumu Santu Versini morsi in Aiacciu u 21 dicembri di u 1922.
Opari
[mudificà | edità a fonte]
- Sirinatu: un sirinatu publicatu di marzu 1914 in A Cispra.
- U Pastore: una puesia publicata di marzu 1914 in A Cispra. Hè dedicata à u missiavu di l'autore.
- Dialogu: un dialogu in versi trà a Corsica è a Francia publicatu di marzu 1914 in A Cispra.
- M'innamoru: una puesia scritta in A Soccia in u 1888 è publicata di marzu 1914 in A Cispra.
- Neve: una puesia publicata di marzu 1914 in A Cispra.
- Vindetta: una puesia publicata di marzu 1914 in A Cispra
- Ave Maria
- À i me Sculari: una puesia creata in u 1921.
- Fiore è Fritelle: una puesia publicata u 4 maghju di u 1922 in L'Èveil.
- À mezanotte in puntu: una puesia publicata in un'articulu entitualtu Versini Ghjacumu Santu, in Rigiru n°7, Edizione Ambrosini Niculaiu, 1977[2].
Note
[mudificà | edità a fonte]- ↑ Intrata entitulata "Ghjacumu Santu Versini" in a Mediateca Culturale di a Corsica è di i Corsi.
- ↑ P. 13.
Bibliugrafia
[mudificà | edità a fonte]- Matteu Ceccaldi (1976) Antulugia di a litteratura corsa, Klincksieck: Parighji
- Saveriu Paoli è Ghjacumu Santu Versini, A Cispra - Antologia Annuale, Marseglia, marzu 1914
Ligami
[mudificà | edità a fonte]- Videu: Dumenicantone Geronimi parla di Ghjacumu Santu Versini
- Julian Mattei, "Ghjacumu Santu Versini", Mediateca Culturale di a Corsica è di i Corsi, consultatu u 2 mai di u 2015, http://m3c.univ-corse.fr/omeka/items/show/1047 Archiviu 2016-09-21 at the Wayback Machine.
- Ghjuvan' Guidu Talamoni, Versini Ghjacumu Santu (1867-1922), L'Enciclopedia di a Corsica Archiviu 2010-04-25 at the Wayback Machine