gant ma

Brezhoneg

Etimologiezh

Savet diwar an araogenn gant hag ar stagell ma.

Stagell isurzhiañ

gant ma /Distagadur ?/

1. Dirak ur verb en amzer-da-zont an doare-disklêriañ
   • Her gouzout a rit kerkoulz ha me, tud difeiz ne droont james kein da ijin ebet, mat pe fall, evit dont a-benn eus o zaol : pep hent a zo mat dezho gant ma c'hellint tapout o c'hrog. — (Lan Inizan, Emgann Kergidu 1, Brest, 1877, eil emb. Al Liamm 1977, p. 13.)
   • Mad ! en eur zelaou va c'halon hag o kredi e vezin eürus, evel a leverez, me ne c'houlennan ket gwell evit mont ganez da gaout map roue an Hiberni, gant ma teuio ivez, ganeomp hon daou, va magerez hag he merc'h ; [...]. — (G. MILIN, Gwechall-goz e oa..., Kemper, 1924, p. 14.)
   • Ha pa 'z eas, e voe digemeret el lez evel eur prins eus ar re vrasa. - Gant ma viot pinvidik e vezo great stad ac'hanoc'h. — (G. MILIN, Gwechall-goz e oa..., Kemper, 1924, p. 66.)
   • « [...] en em gaout abred a-walc'h a raimp, gant ma vezo graet da bak ganit warc'hoazh da c'houloù-deiz. » — (Troude ha Milin, Labous ar Wirionez ha Marvailhoù all, Skridoù Breizh, 1950, p. 110.)
   • [...] ; gra ar pez a gari, er c'hiz mar kari, gant ma teui abenn eus da daol ; [...]. — (Ivon Krog, Klenved ar Medalennou, Ti-moulerez Sant-Gwilherm, Sant-Brieg, 1909, p. 37.)
   • Ne ran ket kalz a van, gant ma teuio ar vedalen. — (Ivon Krog, Klenved ar Medalennou, Ti-moulerez Sant-Gwilherm, Sant-Brieg, 1909, p. 2.)
   • Kerlaban. — Me ne ran ket kalz a forz penaoz e komzint, gant ma livirint d'in ar pez am eus ezomm da glevet. — (Yann-Vari Perrot, An Aotrou Kerlaban Pez farsus e 3 Arvest, Brest, 1922, p. 37.)
   • — [...]. N'eus riskl ebet evidomp gant ma chomo pep hini sioul-tre war e gador. [...]... — (Jarl Priel, An Teirgwern Pembroke, Al Liamm, 1959, p. 18.)
   • Dont a reot gant ma fello d’eoc’h suja ho kleñved : ar vezventi. — (Yann ar Floc'h, Koñchennou eus Bro ar Stêr Aon, Levrdi Le Dault, Kemper, 1950, p. 24.)
   • Ret eo komz, lavarout un dra bennak, n'eus forzh petra, gant ma vo torret ar sioulañs. — (Vefa de Bellaing, Ar peskig ruz, Al Liamm niv. 178, Gwengolo-Here 1976, p. 315.)
2. Dirak ur verb en doare-divizout gant -fe:
   • — Ne c'houlennan ket beza pinvidik : gant m'am be peadra da veva va zorrad en o eas a zo a-walc'h... Petra 've red da ober evit se, aotrou ? — (G. MILIN, Gwechall-goz e oa..., Kemper, 1924, p. 86.)
   • « Ha koulskoude lakaet am eus em spered kiañ ouzh al labour, kiañ a lazh-korf betek mervel warni, gant ma vefe roet din un tammig lañs. » — (Jarl Priel, Va Buhez e Rusia, Al Liamm, 1955, p. 10.)
3. Dirak ur verb en doare-divizout gant -je:
   • Gant ma paeje ho kerent pemp lur war-nugent all er bloaz, desket e vije deoc'h tresañ ha livañ, pe seniñ n'eus forzh petore benveg. — (Jarl Priel, Va Zammig Buhez, Al Liamm, 1954, p. 51.)
   • Met c'hwec'h kant lur, va Salver binniget ! e ti ur madoberour bennak na vefe ket re stag-holl ouzh e gregin e rankjen tunañ ar vozad aour-se, anez-se gant ma c'hwitjen war vadelezh an nesañ, e vije ret mat din mont da laerezh. — (Jarl Priel, Va Buhez e Rusia, Al Liamm, 1955, p. 4.)
4. A verk un het (ster nevez, deuet eus ar galleg marteze, dre ma vez implijet "pourvu que" e galleg da verkañ an het).
   • Gant ma ne zeuio ket ! Amzer a zo c'hoazh avat : un hanter-eur. — (Youenn Drezen, Sizhun ar Breur Arturo, Al Liamm, 1971, p. 80.)
   • - Goloiñ a ra an oabl...
     - Gant ma ne ray ket glav ?
     - Glav ne vo ket gant an avel a c'hwezh war ar menez. — (Jakez Riou, Geotenn ar Werc'hez ha danevelloù all, Al Liamm, 1957, p. 52.)

Troidigezhioù

• galleg : pourvu que ^(fr)