Park Geun-hye
- Un anv eus Korea eo Park Geun-hye ; Park eo an anv-familh.
Park Geun-hye (koreaneg 박근혜), bet ganet d'an 2 a viz C'hwevrer 1952, zo ur bolitikourez eus Sukorea a zo bet 11vet Prezidant Sukorea adalek ar 25 a viz C'hwevrer 2013 betek an 10 a viz Meurzh 2017, ar c'hentañ maouez e oa bet da dizhout ar post-se. Merc'h eo-hi da Park Chung-hee, a oa bet prezidant Sukorea goude Taol-Stad ar 16 a viz Mae ha chomet er galloud etre 1963 ha 1979.
D'an 9 a viz Kerzu 2016 e oa bet digadoriet Park Geun-hye gant bodad broadel Sukorea a damalle dezhi bezañ bet harpet embregerezhioù bras da gaout kevratoù gant ar Stad. Barnet e voe an digadoriañ gant lez-varn vonreizhel ar vro ha d'an 10 a viz Meurzh 2017 e voe kadarnaet diviz ar vodadeg ha torret Park Geun-hye diouzh he c'harg da vat.
