Lan Tangi
Lan Tangi, Alain Tanguy war varilh an ti-kêr, hag eñ ganet d'an 28 a viz Mezheven 1951 e Karanteg, zo ur skrivagner hag un troour brezhonek. Troet en deus skridoù e saozneg hag e brezhoneg. Kelenner eo e vicher. Ha kregiñ a ra da c'hoari er sinema.
Buhez
[kemmañ | kemmañ ar vammenn]Ganet eo war ar maez en atant e eontr hag e voereb, c'hoar e dad. E dad a oa eus Bro-Leon hag e vamm eus Menez Are, met kaset e voe ur pennadig war-lerc'h da di e dud-kozh eus tu e vamm en ur gêriadenn anvet Krann Vihan e parrez Berrien. Chomet eo eno betek an oad a 5 bloaz e ti e dud-kozh peogwir e voe kaset d'ar skol, da Santeg, e-lec'h ma oa skolaerien e dud. O chom e oant en ti-skol. Ur bloaz war-lerc'h e oa anvet e dud e Lokmaria-Berrien, (Menez Are). Chomet int daou vloaz eno a-raok mont da Garanteg, bro e dad, e-lec'h ma 'z int chomet betek ma 'z int aet war o leve.
Studioù
[kemmañ | kemmañ ar vammenn]Evit ar pezh a sell ouzh e studioù, e voe kaset d'ul lise e Montroulez a-benn tapout e vachelouriezh ha mont goude da Skol-veur al Lizhiri e Roazhon.
E vuhez vicherel
[kemmañ | kemmañ ar vammenn]Nac'het e oa bet gantañ mont d'an arme, neuze e voe ret dezhañ kuzhat e-pad bloaz. Goude-se ez eo bet o foetañ bro en Europa, Afrika, Azia hag Amerika. Pa oa tost 40 vloaz e oa distroet d'ar skol-veur, lec'h ma tapas un aotreegezh war ar brezhoneg. A-benn ober se en deus studiet dre bellgelennerezh e-pad 2 vloaz. Goude eo deuet da vezañ kelenner war ar brezhoneg ha peurzesket en deus ar yezh gant kelennerien all peotramant drezañ e-unan. Emañ bremañ e kevelouri Roudour o lakaat an dud deuet d'o oad da zeskiñ brezhoneg. Bet eo unan eus krouerien Roudour asambles gant Herve Kerrain ha Mich Beyer.
Kroget e oa da skrivañ traoù berr abred a-walc'h p'en deus gwelet ar yezh skrivet : kanaouennoù pe barzhonegoù. Kroget e oa war-dro an oad a 20 vloaz da skrivañ barzhonegoù hag ez eo kendalc'het d'en ober a-frapadoù. Diwezhatoc'h eo aet war-zu an danevelloù.
Mennozhioù
[kemmañ | kemmañ ar vammenn]Ar pezh 'n deus lakaet anezhañ da skrivañ eo e oa naturel evitañ dre an endro ma oa bet desavet ennañ e-keñver ar yezh hag endro al levrioù. Er bloavezhioù hanter-kant e veze graet nozvezhioù war ar maez hag e veze kanet ha kontet istorioù. Skrivañ kanaouennoù a veze graet gant ur bern tud d'ar mare-se, un dra naturel e oa evito da ezteurel o soñjoù dre ganaouennoù. « D'am soñj eo an endro en deus bountet ac'hanomp (Bernez Tangi, e vreur, hag eñ) d'ober ar memes tra, da vont da heul ur seurt hengoun a oa er familh. Daou genderv din hag a zo bet desavet er memes kêriadenn o deus skrivet traoù e brezhoneg ivez. Unan anezho hag a zo marvet yaouank, en doa diskouezet din danevelloù bet skrivet gantañ. An hini all hag a skriv kanaouennoù a gan anezho ivez, en deus tapet e damm brud e-giz kaner a zo anvet Kristen Nikolaz.
Oberennoù
[kemmañ | kemmañ ar vammenn]- Mousafir, 1997. Dastumad barzhonegoù. Priz Langleiz 1998. Priz Imram 2001.
- Da goulz an avaloù. 2001. Danevelloù.
- Gant Gilles Pouliquen Menez Are (testennoù ul levr luc'hskeudennoù –2003)
- Diwar an uhel, 2007
- Alo,alo amañ Job. Pezh-c'hoari evit ar radio – 2007.
Barzhonegoù bet troet e yezhoù all
[kemmañ | kemmañ ar vammenn]- Per atzar aquella veu (gant Alan Botrel – Emboscall Katalonia),
- Writing the wind, (New Native Press-Amerika)
- The turn of the ermine, (Bro-Saoz)