Anv divoutin
An anvioù divoutin a zo ur rummad anvioù disheñvel diouzh an darn vrasañ eus an anvioù all, da lâret eo an anvioù boutin, dre ma reont dave da draoù, da lec'hioù, da dud, a zo resis, ha n'eus nemet unan anezho, d.s. Paol, Plouared, Yaou (ar blanedenn pe an doue).
Eus an anv boutin d'an anv divoutin
[kemmañ | kemmañ ar vammenn]Petra bennak ma c'hell un anv divoutin dont eus un anv boutin, ne servijo nemet da ober dave d'un dra pe d'un den resis. Da skouer
- an Aotroù 'Kemener' n'eo ket ur c'hemener,
- an Itron Pennsivi n'eo ket ur penn-sivi,
- hag Alan al Louarn n'eo ket ul louarn.
E meur a yezh, hag ar brezhoneg en o zouez, e vez implijet pennlizherennoù e deroù an anvioù divoutin, da skouer:
- an anv boutin: ar gov
- an anv divoutin: ar Gov
Anvioù divoutin eo an anvioù tud ha lec'hioù, evel : Korsika, Napoleone.
Anvioù divoutin ivez eo :
- an anvioù loened evel Babar, Jolly Jumper.
- an anvioù boutin kemeret evel anvioù tud, pe lec'hioù:
- un ti gwenn, met an Ti-Gwenn,
- ur chapel nevez, met ar Chapel Nevez,
- un dimezell met an Dimezell,
- stadoù unanet, met ar Stadoù-Unanet,
- ur mor du, met ar Mor Du
- anvioù boutin implijet evel pa vijent tud, pe doueed, pe traoù sakr, pe traoù divoaz (divoutin eta):
- an Iliz, an Aoter, ar Stad, an Arme, ar Galloud, al Levr (ar Bibl), ar Ouenn, an Urzh, ar Bed, Deiz ar Varn
- anvioù levrioù ha filmoù: An Ti a Drizek Siminal.
- anvioù darvoudoù: Gouel ar Brezhoneg, Tro Bro-C'hall, Ar Redadeg.
Eus an eil yezh d'eben
[kemmañ | kemmañ ar vammenn]Disheñvel e c'hell bezañ emzalc'h yezhadurel an anvioù divoutin diouzh hini ar re voutin e yezhoù zo, da skouer e brezhoneg ne vez ket implijet ar ger-mell strizh gant an anvioù divoutin peurliesañ. Kemmañ a ra seurt emzalc'hioù a yezh da yezh, kv.:
- brezhoneg: e Breizh (hep ger-mell)
- spagnoleg: en Bretaña hep ger-mell)
- saozneg: in Brittany (hep ger-mell)
- portugaleg: na Bretaña (gant ar ger-mell strizh; em + a > na)