Бамбукавыя з’яўляюцца найбольш разнастайнай трыбай у сямействе злакаў і змяшчаюць каля 75 родаў і больш за тысячу відаў[4]. Пашыраны ў тропіках і субтропіках Азіі, Афрыкі, Аўстраліі, Паўднёвай і Паўночнай Амерыкі, на астравах Ціхага акіяна[5].
Звычайна маюць паўзучае карэнішча і моцна развіты адраўнелы ствол (саломіну), вышыня якога да 35 м, дыяметр да 30 см. Лісце пераважна ланцэтнае, цвёрдае, з похвамі і кароткім чаранком. Кветкі сабраныя ў каласкі, плод — зярняўка[6].
