Лімасол
| Лімасол | |
| грэц. Λεμεσός | |
| |
| Краіна: | Кіпр |
| Раён: | Лімасол |
| Кіраўнік: | Нікас Нікалаідэс[d][1] |
| Плошча: | 50,87 км² [2] |
| Вышыня: | 0—30 м н. у. м. |
| Насельніцтва (2011) | |
| колькасьць: | 101 000 чал. |
| шчыльнасьць: | 1985,45 чал./км² |
| Часавы пас: | UTC+2 |
| летні час: | UTC+3 |
| Тэлефонны код: | 357 25 |
| Паштовыя індэксы: | 3010—3150 |
| Геаграфічныя каардынаты: | 34°40′29.989″ пн. ш. 33°2′39.430″ у. д. / 34.67499694° пн. ш. 33.04428611° у. д.Каардынаты: 34°40′29.989″ пн. ш. 33°2′39.430″ у. д. / 34.67499694° пн. ш. 33.04428611° у. д. |
Лімасол на мапе Кіпру   Лімасол | |
 Галерэя здымкаў у Вікісховішчы
| |
| http://www.limassolmunicipal.com.cy/ | |
Лімасо́л (па-грэцку: Λεμεσός, па-турэцку: Limasol або Leymosun) — горад на поўдні Кіпру, цэнтар аднайменнага раёну. Другі паводле колькасьці насельніцтва на Кіпры пасьля сталіцы Нікасіі.
Мінуўшчына
[рэдагаваць | рэдагаваць крыніцу]На тэрыторыі сучаснага Лімасолу выяўленыя пахаваньні, датаваныя II тысячагодзьдзем і VIII, IV стагодзьдзямі да н. э. Дакладная дата заснаваньня ў крыніцах не сустракаецца. Вядома, што паселішча знаходзілася між старажытнагрэцкімі местамі Аматусам і Курыёнам. У 85 року да Н. Хр. армянскі імпэратар Тыгран Вялікі, заваяваўшы Сырыю, Лібан і Анатолію, дайшоў да Лімасолу, абараняючы сваіх грэцкіх хаўрусьнікаў ад Рымскай імпэрыі.
У часе Трэцяга крыжовага паходу Кіпр перайшоў ад Бізантыі да англа-нарманаў (1190). Праз год востраў за 100 000 бэзантаў быў прададзены рыцарам-тампліерам. З прычыны ўведзеных высокіх падаткаў на Кіпры выбухнула паўстаўньне, у выніку чаго кароль Рычард Львінае Сэрца перапрадаў яго францускай дынастыі Люзіньянаў. Лімасол стаў транспартным вузлом і гандлёвым цэнтрам, тут былі заснаваныя каталіцкія кляштары.
У 1489 року кіпрская каралева Кацярына Карнара прадала востраў Вэнэцыі. Новыя ўладальнікі ўмацавалі Лімасольскі замак.
У 1570 року ў часе вайны з Вэнэцыяй асманы захапілі Лімасол. Усходняя частка места засталася пераважна грэцкай, у заходняй стала пераважаць турэцкае насельніцтва.
У 1878 року Кіпр перайшоў пад уладу Брытанскай імпэрыі. Першы брытанскі губэрнатар Лімасолу заняўся ўпарадкаваньнем места, зьявіліся таксама партовыя докі. У 1880 зьявілася асьвятленьне цэнтральнай часткі; у 1912 яно было замененае электрычнасьцю.
Транспарт
[рэдагаваць | рэдагаваць крыніцу]Гарадзкое і міжгародняе злучэньне ў Лімасоле забясьпечваюць аўтобусныя маршруты.
Непадалёк знаходзяцца два міжнародныя аэрапорты: Ларнака (каля 50 км на паўночны ўсход) ды Пафас (каля 50 км на паўночны захад).
Порт Лімасолу — галоўны марскі порт Кіпру.
Клімат
[рэдагаваць | рэдагаваць крыніцу]Клімат Лімасолу — субтрапічна-міжземнаморскі з гарачым сухім летам і лагоднай зімой; вясна і восень кароткія і пераважна цёплыя ды сонечныя. У сьнежні — сакавіку надвор’е пераменлівае, часта даждлівае і вятрыстае. Тэмпэратура не апускаецца ніжэй за нуль, а часьцей за ўсе вагаецца ў прамежку ад 16°C да 20°C удзень і 7—12°C уначы. Сьнег выпадае вельмі рэдка і тое ўперамешку з даждом.
Вясна лагодная і прыемная, сонца сьвеціць амаль штодзень, дзённая тэмпэратура — 19—20°C, начная — 9°C. У канцы сакавіка — красавіку частыя залевы і навальніцы. Зь ветрам у паветра можа заносіцца пясок з пустыні Сахары.
Лета — найдаўжэйшая паравіна году: ад траўня да кастрычніку. Сонца пячэ кожны дзень, ападкі рэдкія. Тэмпэратура вар’юецца ад 19°C да 30°C у чэрвені і верасьні і ад 22°C да 40°C у ліпені і жніўні.
У лістападзе пачынаецца цёплая і пераважна сонечная восень. Тэмпэратура на двары складае ад 12—20°C. Надвор’е можа быць пераменлівым з году ў год: ці то навальніцы, ці то засухі. Сярэднегадавая колькасьць ападкаў у Лімасоле складае 410 мм, але яна вельмі адрозьніваецца ў розныя гады. Кожныя 3—5 гадоў здараюцца засухі.
Эканоміка
[рэдагаваць | рэдагаваць крыніцу]Разьвіцьцё турызму ў Лімасоле пачалося пасьля 1974 року, калі Фамагуста і Кірэнія, галоўныя курорты Кіпру, былі акупаваныя Турэччынай. У месьце дзейнічае мноства пляжаў, прыдатных для купаньня і загараньня.
Пасьля захопу туркамі порту Фамагусты ў 1974 року галоўным марскім портам Кіпру стаў порт Лімасолу.
У Лімасоле разьмешчаныя мноства вінакурных кампаніяў, якія выпускаюць віно і каньякі зь вінаграднікаў паўднёвых схілаў Троадасу.
Славутасьці
[рэдагаваць | рэдагаваць крыніцу]- Сярэднявечны замак — адзін зь дзесяці замкаў Кіпру. Збудаваны за бізантыйскім часам каля 1000 па Н. Хр. Цяпер тут дзейнічае музэй сярэднявечнай гісторыі.
- Археалягічны музэй.
- Музэй народнага мастацтва.
- Батанічны сад.
Спорт
[рэдагаваць | рэдагаваць крыніцу]У Лімасоле разьмешчаныя спартовыя клюбы Апалён і АЭЛ, якія маюць баскетбольныя, валейбольныя і футбольныя каманды.
З 2006 року ў месьце ладзіцца маратон.
Крыніцы
[рэдагаваць | рэдагаваць крыніцу]- ^ а б Curriculum Vitae - Nicos Nicolaides — Лімасол.
- ^ Solutions Limassol City (анг.). Limassol Tourism Development & Promotion Company. Праверана 30 ліпеня 2020 г.
Вонкавыя спасылкі
[рэдагаваць | рэдагаваць крыніцу]- Усё пра Лімасол (грэцк.)
- Бачына грамады Лімасолу (грэцк.)