Saxaul

Der Artikl is im Dialekt Owaöstareichisch gschriem worn.

Saxaul
Saxaulbaam in da Mongolei
Systematik
Untaklass: Nöiknähnliche (Caryophyllidae) Ordnung: Nöiknoatige (Caryophyllales) Famij: Fuxschwaunzgwächse (Amaranthaceae) Goddung: Saxaul (Haloxylon) Oart: Saxaul
Wissnschoftlicha Nama
Haloxylon ammodendron
(C. A. Mey.) Bunge

Da Saxaul (Haloxylon ammodendron, aa Anabasis ammodendron) is a Pflaunznoat aus da Familie vu de Fuxschwaunzgwächse (Amaranthaceae). Da Saxaul is a Strauch, den ma in de trocknen Steppm und Wüstn in Zentralasien findn kau.

Wia'ra ausschaud

D'Hächn vu so am Saxaul is um de 2 bis 4 Meta – ea is osio a niadriga Baam oda a hocha Strauch. Seine Bledschn han recht kloa, da Saxaul schaud desweng aa ziemli bladllos aus. S'Hoiz is grob und schwaa, d'Rindn schwaummig und wossaspeichand.

Wo ma'n findt

S'Vabreitungsgebied vum Saxaul geht üwa an großn Teu vu Asien: Es gibt'n vum Ural üwa'n Iran, duach Tuakestan bis in'd Mongolei und zu de kinesischn Provinzn Gansu, Innare Mongolei, Ningxia, Qinghai und Xinjiang.

De Saxaulbaam woxn auf Waundadünen, in Föistäla und auf de Hänge vu Hügin.

Ökologie

In Saxaul findt ma oft in großa Zoih, ma redt daun vu „Saxaul-Wöida“, de allaa in da Süd-Mongolei 45.000 km² bedeckn. Des Habitat is d'Hoamad vu mearare Viechal wia zum Beispüi vum Saxaul-Spotzn (Passer ammodendri).

Nutzung

De wossaspeichande Rindn bedeitt fia de Nomadn vu dera Region a Meglichkeit Wossa z'kriang, außadem is da Saxaul aa a Feiahoiz. Weu s'Öi und d'Koihn teira woan han, is d'Vabreitung vum Saxaul mittlaweile zruckgaunga.

In gaunz Zentralasien wiad da Saxaul zum Befesting vum Bodn pflaunzd, damid de Deseatifikazion eidämmd wean kau.

A parasitische Pflaunzn bei de Wuazn vum Saxaul wiad vu de Kinäsn „Wiastn-Ginseng“ gnennt und in eanara traditionöin Medizin vawendt.

Im Netz

• Eintrog bei GRIN Taxonomy for Plants (englisch)

→ Dea Artikl basiad auf ara frein Ibasetzung vom säim Artike in da Wikipedia af Deitsch in da Version vom 13. Oktowa 2008 um Hoiwa 7i am Omd.