La Penilla

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

La Penilla (oficialment, en castellano, «Lapenilla») ye un lugar aragonés d'el municipio de la Fueva, en la comarca de Sobrarbe y la provincia de Uesca. Actualment ye despoblau.

La Penilla
Despoblau d'Aragón
Envista de la Penilla.
Entidat  • País  • Provincia  • Comarca  • Municipio	Despoblau  Aragón  Uesca Sobrarbe A Fueva (municipio)
Partiu chudicial	Boltanya
Población  • Total	0 hab. (2010)
Altaria  • Meyana	670 m.
Distancia  • 101 km  • 39 km  • 24 km	enta Uesca enta L'Aínsa enta Tierrantona
Codigo postal	22438
Parroquial  • Diocesi  • Arcipestrau	Balbastro-Monzón Sobrarbe-Ribagorza
Coordenadas
La Penilla La Penilla en Aragón

Cheografía y historia

Se troba en una altura menuda, como cerro d'as estribacions meridionals de la sierra de Turón, en a val de Cinca y, en l'actualidat, chunto a la ribera de l'entibo de lo Grau. Forma parte d'a cuenca d'el barranco de Clamosa (significativament, tamién dito «de la Penilla»), en a ripa cuentra d'an ye Clamosa. Va formar parte d'el municipio de Clamosa dica l'absorción en a Fueva en a decada de 1960, consecuencia de la total despoblación que van sufrir los dos nuclios mas grans que en formaba parte, Clamosa y la propia Penilla.

La Penilla ye el zaguer nuclio en a comarca de Sobrarbe por el sud, respective a'l curso d'el río Cinca, pus a 1 kilometro mas auguas t'abaixo d'el lugar el río pasa a estar la buega entre el Semontano (Mipanas) y la Ribagorza, por debant de l'aldeya de Pui de Cinca, tamién conoixida como Villagarda. L'acceso se fa posible por una pista engudronada que naixe en el lateral de la carretera local HU-V-6441 de Graus ta Troncedo en pasando por Pano.

Como muitos atros lugars de l'Alto Aragón, la Penilla presenta una estructura defensiva que posiblement se remonta a la Edat Media. L'historiador Manuel Benito Moliner afirmaba que i heba esistiu un castiello, las suyas enrunas aún se podrían trobar en el sallent de penya a l'ueste de la población, que se trobaba en mans cristianas en l'anyo 1067. En el cabo d'alto d'el lugar, a 670 metros d'altaria, se troba un palacio u casal fuerte que recibe el nombre de Casa El Sinyor, que albergaba el salón de baile y la escuela, y que en chunto con la ilesia ye uno d'os atractivos d'el lugar, anque en l'actualidat se troba runicau. Se sabe positivament que el lugar yera sinyoría d'os Mur de Muro de Roda en el sieglo XVI, y que en el sieglo XVIII y sieglo XIX en yera d'os Heredia de Graus.

Economía

Bellas casas en a Penilla fan pensar d'un pasau que podría haber estau prou acomodau. Casa o Sinyor, en a imachen, yera d'un chenullo d'os Mur de la Fueva, que van estar sinyors d'el lugar dende el sieglo XVI.

Economicament, la Penilla yera un lugar de preponderancia agricola, con los campos estructuraus en faixas y faixetas que dende los arredols de los casaches se prolargaban baixant t'allá en tres de los cuatro costaus por an que a orografía lo permite. Los cerials sembraus en as faixas yeran el cautivo que, d'alcuerdo con lo que s'ha puesto constatar, yeran principals. Manimenos, como tamién gosa pasar en muitos atros lugars, las oliveras y las almendreras plantadas en las marguins complementaban la productividat agricola de las fincas y achudaban a contener la tierra, y bellas fincas s'adedicaban a la producción de vinya, que feba vino pa consumo propio.

En a ganadería, M. Benito Moliner pensaba que yera un oficio que heba perdiu terreno dende el sieglo XIX dica la despoblación final, y calculaba unas 20 cabezas de bestiar (entre uellas y crabas) por cada casa, mas los bueis y los mastos que se podese tener. Bel conillo y bella gallina complementarían la producción animal pa achudar a l'alimentación d'os habitants, y bel poquet de ganadería menor (principalment abellas; de forma mas residual cucos de seda tamién) habrían puesto dar productos mas secundarios como pa vender-ne ta fuera de lugar.

La Penilla teneba tamién un molín d'olio anque no en teneba garra de grano, lo que fa pensar de cómo yera de principal la producción d'iste lequido en a comarca (p. ex. en Clamosa se i va gosar producir 3.000 kg en 1787) pero pa fer-se moler o grano heban d'ir ta la vecina capital municipal que yera Clamosa. Un tellero y una producción menor de lenya y carbón vechetal con las lecineras y los caixigos de la redolada completaban la industria d'el lugar.

Demografía

Anque se tiene conoixencia de la Penilla dende el sieglo XI, seguntes Benito Moliner no se'n puede trobar garra referencia demografica anterior a 1646, que en estando sinyoría d'os Mur, en la Penilla se contan 8 fuegos (casas) que el propio autor estima representarían a cosa de cuatro u cinco habitants por cada casa, d'entre 32 y 40 habitants en el lugar.

En 1713, en la Penilla el numero de casas (fuegos) s'habría reduciu a la metat, con 4 fuegos, lo que faría un total de 20 dica 25 habitants d'alcuerdo con o promeyo de 4-5 habitants/casa que Manuel Benito troba adecuau pa ixas envueltas. En 1787, sisanta y cuatro anyos dimpués, el numero de casas que pagaban treudos en la Penilla se conserva estable, con 4 fuegos, pero con una ocupación domestica estimable en 13 personas/casa, lo que daría un total de 52 habitants.

Ta 1860, el numero d'ocupadors de cada casa habría baixau dica 9,1 hab./casa, pero con un total d'once casas, lo que faría una población total arredol d'os 100 habitants en el lugar, y en 1900, con un promedio d'ocupación de 8,45 hab./casa, la población en a Penilla rondaría los 93 habitants.

En l'actualidat y dende los anyos 1960, cuan la Confederación Hidrografica de l'Ebro lo va expropiar, la Penilla se troba de tot despoblau.

Lengua

Detalle de l'interior de la ilesia de la Penilla, en 2010.

En el lugar de la Penilla se charraba fovano con bel rasgo propio como l'emplego de los articlos el, la, los, las, propio d'os lugars orientals d'a Fueva como Clamosa, Troncedo, Villagarda, Puicinca y tamién Foradada en el norte. Tamién usaban el pronombre «mos», coincident con l'aragonés ribagorzano, en cuenta de «nos» que ye el mayoritario en la Fueva. Pero los rasgos de frontera que lo encuadran en el fovano y no pas en el ribagorzano son claros: cherundios fendo, cantando, usmiando, malmetendo, no palataliza la L: lugar, luna, libro, placeta, planura, flama, y las formas verbals de la primera persona d'el plural son completas, femos, venimos, ibanos, faremos, imos.

La resta de rasgos foneticos y gramaticals son identicos a los d'a Fueva:

-Conservación de F latina inicial y dentro de palabra: afogar, afumar, farina, faba, fecho, fer, ferradura, forniga, fumo, fuso, forno.

-Conservación d'a prepalatal fricativa sorda X: ixugar, ixo, ixordiga, ruxada, ixena, ixaguadizos, teixón.

-Pronunciación d'a R final: ixugar, tociar, muller, lugar, usmiar, venir.

-Uso de o perifrástico: vamos venir. van fer, se va espantar, va entrar.

-Uso de pronombres en, i: me'n voi, pensando-ie, no'n quiere, se'n iba.

-Paradigmas verbas regulars e irregulars fovanos: feba, quereba, teneba, fez, querez, tenez, tiengo, viengo.

-Participios fuertes: dicho, fecho, quiesto, puesto

El lexico ye el mesmo que se gosa usar en tot Sobrarbe y Somontano de Barbastro y coincidente con el Ribagorzano que lo adapta a la suya fonetica de transición. engardaixina, requesta, ruixada, chent, choven, planura, palluzo, misache, ixordiga, ixenar-se, maronyal, figau, fizar, fartalla, estroliquiar, flama, chubo, chilar, chemecar, zancallazo, tociar.

Imáchens

• 
  Interior de la ilesia de Sant Chulián (s. XVIII).
• 
  Campanal de la Sant Chulián, ta la Purisma de 2010.

Fiestas

• 6 de chinero, fiesta d'hibierno, en celebración de la Epifanía de Betlem.
• Lunes de Pascua, romería ta la ermita de Sant Martín.
• 13 d'agosto, Fiesta Mayor, en honor a sant Póliz.

Vinclos externos

• Se veigan as imáchens de Commons sobre la Penilla.

• Datos: Q9020264
• Multimedia: Lapenilla / Q9020264