Wake
Wake isch es Atoll im Pazifik, wo as Ussepiet zu den USA ghört.
Es lyt im Meer zwüsche Hawaii und de Nördleche Marianeinsle. Es isch en Inslegruppe, wo us drüü Koralleninsle bestoot, wo en Chreis rund um di grossi Lagune umme bilde. Die het e Flechi vo öppe zää Kwadratkilometer. D Insle mache zämezelt e Bodeflechi vo öppe sibe Kwadratkilometer uus. D Hauptinsle isch Wake Island, die andere heisse Peale Island und Wilkes Island.
S Meer mit de Insle ghört zum Naturschutzpiet Pacific Remote Islands Marine National Monument.
Wake heisst i der Sprooch, wo uf den Insle i däm Deil im Pazifik yheimisch isch, em Marshallesisch, Ānen Kio. D Regierig vo de Marshallinsle möcht Wake under ihri Hoheit zrugg nää; es isch e Fall vom ene internazionale territoriale Komflikt.
Der Spanier Álvaro de Mendaña y Neira het d Insle anne 1568 as erschte Öiropäer entdekt. Wo ane 1796 s änglische Schiff Prince William Henry dörthi cho isch, het men em Atoll wäge däm sim Kapitään, em William Wake, der Name gää, wo sider gilt. 1899 isch d Inslegruppe vo den USA in Psitz gnoo worde, zum druff e Telegrafestazion yzrichte. Im Zwöite Wältchrieg isch der amerikanische Milidärposchte vo de Japaner ane 1941 eroberet un bis 1945 bsetzt worde.
Literatur
[ändere | Quälltäxt bearbeite]- Edwin Horace Bryan: American Polynesia and the Hawaiian Chain. Honolulu, Hawaii 1942.
- Edwin Horace Bryan: Notes on the geography and natural history of Wake Island. Smithsonian Institution 1959.
Weblink
[ändere | Quälltäxt bearbeite]
Commons: Wake – Sammlig vo Multimediadateie
