Konstantin IV. vo Byzanz

Konstantin IV. (Byzanz)
Kaiser vom Byzantinische Riich
Dr Konstantin IV. uf ere zitgenössische Münze
Regierigsziit	668 – Septämber 685
Uf d Wält cho	652
Geburtsort	Konstantinopel
Gstorbe	Septämber 685 (im Alter vo 33)
Dodesort	Konstantinopel
Vorgänger	Mezezius Konstans II.
Nochfolger	Justinian II.
Verhürotet mit	Anastasia

Dr Konstantin IV. (* um 650; † 685; latiinisch Flavius Constantinus, middelgriech. Κωνσταντίνος Δ′) isch vo 668 bis 685 byzantinische Kaiser gsi. Dr Biinaame Pogonatos (Πωγωνάτος‚ „dr Bärtigi“) isch woorschiinli uf si Vater Konstans II. bezooge gsi.

Dr Konstantin IV. isch dr Soon vom Kaiser Konstans II. gsi. Dä het in de letschte Joor vo sim Lääbe si Residänz uf Sizilie verläit und vergääblig verlangt, ass si Soon und Mitkaiser au dört aane chiem. Wo dr Konstans 668 ermordet worden isch, isch z Syrakus dr Armenier Mizizios zum Augustus usgrüeft worde. Es git Kwelle wo sääge, ass dr Konstantin IV. denn persöönlig mit ere Flotte vo Konstantinopel uf Sizilie gseeglet sig, zum d Usurbazioon niiderschloo. Öb das aber woor isch, isch in dr Forschig umstritte. Sicher isch nume, ass dr Mizizios noch e baar Möönet umchoo isch.

Dr Konstantin het sini bäide Brüeder Herakleios und Tiberios lo verstümmle, für dass si nid chönnte an d Macht cho. Er het e baar milidäärischi Erfolg ghaa: 678 het er die ersti Belaagerig vo Konstantinopel dur d Araber abgweert und drbii iiri Flotte vernichtend gschlaage. D Araber häi denn mit em e Friidensverdraag abgschlosse, wo si nume e baar Joor vorhäär nit aagnoo hätte. 685 isch dr Verdraag ernöijeret worde. En andere Erfolg isch d Integrazioon vo de Sermesianoi, offebar Noochfaare vo dr römischen Provinzialbevölkerig z Pannonie und de römische Gfangene, wo 616 dört aagsiidlet worde si, wo dr Bulgarefürst Kuver 680 uf Makedonie und won er e Chanat errichtet het. Denn häi au no d Berber und dr Exarch vo Karthago d Araber bi Biskra 683 in Nordafrika abgweert. Kirchebolitisch het er sich mit em Babst 681 versöönt.

Wo d Protobulgaren 679 under em Brueder vom Kuver, em Khan Asparuch, in d Browinz Mösie wo denn zum grösste Däil scho slawisiert gsi isch, iigfalle si, het dr Konstantin IV. das nit chönne verhindere, so dass er s nöi gründete Bulgareriich het müesse anerkenne. 680 het er d Äigeständikäit vom Langobarderiich z Italie anerkennt. Dr Konstantin im Alter vo 33 im Joor 685 gstorbe.

Literatur

• John F. Haldon: Byzantium in the Seventh Century. 2. Aufl. Cambridge 1997, S. 63ff.

Weblingg

 Commons: Konstantin IV. – Sammlig vo Multimediadateie

• R. Scott Moore: Fachwüsseschaftligi Churzbiografii uf Änglisch us De Imperatoribus Romanis (inkl. Liddratuuraagoobe).

Vorgänger Konstans II.

Kaiser vo Byzanz 668–685

Nochfolger Justinian II.

Dä Artikel basiert uff ere fräie Übersetzig vu dere Version vum Artikel „Konstantin_IV.“ vu de dütsche Wikipedia. E Liste vu de Autore un Versione isch do z finde.