Hans-Peter Tschudi

D Hans-Peter Tschudi (* 22. Oktober 1913 z Basel; † 30. September 2002 ebefalls z Basel) isch en Schwiizer Politiker (SP) gsii.

Dr Tschudi isch Bürger vo Schwande und vo Basel gsi. Er isch z Basel ufgwachse und het dört und z Paris Rächtswüsseschafte schdudiert. 1936 het er promoviert. 1938 isch er zum Vorsteher vom Gwärbinspektorat gwehlt worde. 1952 isch er Brofässer für Arbets- und Sozialversicherigsrächt an dr Universidät Basel worde. Im gliiche Johr het er d Irma Steiner (1912–2003) ghürotet.

As sozialdemokratische Politiker isch er vo 1944 bis 1953 in dr Stadtbasler Grooss Root gwehlt worde, denn isch er in Stadtbasler Regierigsroot cho und vo 1956 bis 1959 isch er für Basel-Stadt im Ständeroot gsässe.

Er isch am 17. Dezämber 1959 in Bundesrot gwehlt worde anstatt vom Walther Bringolf vo Schaffhuuse, wo dr offiziell Kandidat vo dr SP gsi isch. Während siinere Amtszyt isch er em Departement vom Innere vorgschtande. Er isch Bundesbresidänt gsii i de Johr 1965 und 1970 und Vizepräsident in de Johr 1964 und 1969. Am 31. Dezember 1973 isch er zruggträte.

Drnooch het er an de Universidäte vo Basel und Bärn underrichdet. Vo 1967 bis 1992 isch er Bresidänt vo dr Abgeordneteversammlig vo der Pro Senectute gsi, vo 1975 bis 1987 au Präsidänt vom Forum Helveticum und vo 1975 bis 1992 Präsidänt vom Fründeverein vom Basler Zolli.

Dr Tschudi wird vilmol dr Vater vo dr AHV gnännt. Die Bezeichnig isch irrefüehrend, wil d AHV scho 1947 in ere Volksabschtimmig aagnaah worde isch. Dr Tschudi isch aber für wichtigi Wiiterentwicklige wie s Dreisüüle-Prinzip und d Ergänzigsleischtige verantwortlich.

Literatur

Bernard Degen: Hans-Peter Tschudi In: Historisches Lexikon vo dr Schwiiz.
Hans-Peter Tschudi im Munzinger-Archiv (Artikelaafang frei abruefbar)

Weblink

Hans-Peter Tschudi. In: admin.ch
Hans-Peter Tschudi i de Datebank Dodis vo de Diplomatische Dokument vo de Schwiiz

Vorgänger
Giuseppe Lepori

Mitgliid im Schwiizer Bundesrat
1960–1973

Nochfolger
Willy Ritschard

Dä Artikel basiert uff ere fräie Übersetzig vu dere Version vum Artikel „Hans-Peter_Tschudi“ vu de dütsche Wikipedia. E Liste vu de Autore un Versione isch do z finde.