S Fürstedum Achaia

S Fürstedum Achaia isch äine vo de drei gröössere Wassallestaate vom Latiinische Kaiserriich gsi. Wie säll isch s noch dr Erooberig vo Konstantinopel 1204 wääred em Vierte Chrüzzuug errichdet worde.

Dr Staat

Achaia isch relativ chlii gsi. Es het nume us em Innere vom Peloponnes (Morea) bestande und e baar Hääfe wie Monemvasia. Es het e Gränze mit Epirus und em venezianische Gebiet in dr Egeis gha, und isch riich gnueg gsi, zum em Latiinische Kaiserriich im Kampf gege Nicäa hälfe z chönne.

D Hauptstadt vom Fürstedum isch Andravida gsi, denn e Zentrum vom öiropäische Ridderdum. Si Fürst, dr Wilhelm II. vo Villehardouin, isch e Dichter und Trubadur gsi, und es hette sini äigene Münze, Litratuur und Form vom gschwätzte Französisch ghaa. S Fürstedum het d Chronik vo Morea uusegee, e wärtvolli Gschicht vo de Chrüzfaarerstaate in Griecheland. Si Gsetzgääbig het franzöösischi und byzantinischi Merkmol ghaa und isch d Grundlaag vom Rächt in de andere Chrüzfaarerstaate worde.

Dr Aadel het byzantinischi Ditel wie Logothetes and Protovestarios brucht, uf en Art ass si zum Süsteem vom öiropäische Feudalismus basst häi. Au s byzantinische Pronoia-Süsterm isch aabasst worde: Chliibuure (Paroikoi) häi iir äignigs Land ghaa, drfür häi si Milidäärdienst müesse läiste und Stüüre zaale, was si im ursprünglige Süsteem nit häi müesse. S früeje Fürstedum isch aso e chliini französischi Kolonii gsi.

Gschicht

Achaia isch 1205 vom Wilhelm vo Champlitte, eme Chrüzridder, gründet worde. Er isch e Wassall vom Königriich Thessaloniki worde, wie s Herzogdum Athen au, bis Thessaloniki vom Theodor I., em Despot vo Epirus 1224 erooberet worde isch. Denn het Achaia z Griecheland d Vorherrschaft ghaa.

Dr Wilhelm II. het 1249 d Hauptstadt vo Achaia uf Mistra bim antike Schbarta verläit. 1255 het er e Chrieg für die venezianische Gebiet in dr Egeis aagfange, 1259 het er sich mit em Michael II. vo Epirus gegen e Michael VIII. Paläologos vo Nikaia verbündet. Wo dr Michael vo Epirus denn aber d Site gwäggslet het, isch dr Wilhelm in dr Schlacht vo Pelagonie in d Händ vo sine Gegner gfalle. Wo die 1261 Konstantinopel zruggeroberet häi, häi si dr Wilhelm 1262 freigloo, won er ene Mistra und dr grösst Däil vo Morea gee het.

Noch em Wilhelm isch dr Karl vo Anjou, Köönig vo Neapel und Sizilie Herrscher über Achaia worde. Är und sini Noochfolger häi nid z Griecheland residiert, häi s Fürstedum aber gege d Byzantiner verdeidiget. Wo 1311 die Katalanischi Kompanii s Herzogdum Athen übernoo het, isch d Laag z Achaia unsicher worde. S Fürstedum isch under d Kontrolle vo italiänische Aadlige cho, bis es 1432 dr Thomas Palaiologos, dr byzantinisch Despot vo Morea, erooberet het. 1460 isch s denn an d Osmane gfalle.

Fürste vo Achaia

1205–1209: Wilhelm I. vo Champlitte, Fürst vo Morea
1209–1228: Gopfried I. vo Villehardouin, Fürst vo Achaia, Növöö vom Historiker Gottfried vo Villehardouin
1228–1246: Gopfried II. vo Villehardouin
1246–1278: Wilhelm II. vo Villehardouin, vo 1267 aa Wasall vom Karl vo Anjou
1278–1285: Karl I. vo Neapel
1285–1289: Karl II. vo Neapel
1289–1307: Isabelle vo Villehardouin (1289 bis 1307)
- 1289–1297: Florenz vom Hennegau (Maa und Mitregänt) (Huus Avesnes)
- 1301–1307: Philipp vo Savoye (Maa und Mitregänt)
1307–1313: Philipp I. vo Tarent
1313–1318: Mathilde vom Hennegau
- 1313–1316: Ludwig vo Burgund (Maa und Mitregänt, Herzog vo Athen)
1318–1322: Robert I. vo Neapel
1322–1333: Johann vo Durazzo
1333–1346: Robert vo Tarent (Latiinische Titular-Kaiser)
1364–1373: Philipp II. vo Tarent
1373–1382: Johanna I. vo Neapel
1382–1383: Jakob vo Baux (Latiinischer Titular-Kaiser)
1383–1386: Karl III. vo Neapel (1383 bis 1386)
1383–1396: Interregnum (fümf Pretendänte, wo käine von ene wirklig regiert het)
1396–1402: Pedro Bordo de San Superano (Usurpator)
1402–1404: Maria II. Zaccharia
1404–1432: Centurione Zaccharia (Usurpator, s Fürstedum Achaia fallt bi sim Dood an s Byzantinische Riich)

Litratuur

Wolfgang von Löhneysen: Mistra. Griechenlands Schicksal im Mittelalter. Morea unter Franken, Byzantinern und Osmanen. Prestel, München 1977, ISBN 3-7913-0405-4.
Steven Runciman: Mistra. Byzantine capital of the Peloponnese. Thames Hudson, London 1980, ISBN 0-500-25071-5.

Weblingg

Lateinische Herrschaften in Griechenland im Projekt der Foundation for Medieval Genealogy

Dä Artikel basiert uff ere fräie Übersetzig vum Artikel „Fürstentum_Achaia“ vu de dütsche Wikipedia. E Liste vu de Autore un Versione isch do z finde.