Bundesrat (Dütschland)

Dr Bundesrat – mängisch seit me äm o Länderchammer – isch z Dütschland es wichtigs Verfassigsorgan, wo d (Bundes-)Länder uf de Bundesebni vertritt. Ei vo de wichtigschte Ufgaabe isch sys Mitwürke byr Verabschidig vomne Bundesgsetz. D Lüt, wo dert albe düe rede und sech Gedanke mache übr d Sache vom Bundestag, ob si da sölle zuestimme, sy vo jeder vo de 16 Landesregierige ausgwählt, da häre z gah. Das heißt, by jedere Landestagswahl cha sech d Zämmesetzig vom Bundesrat wider verändere. Disi Landtagswahle sy allerdings nid alli zur glyche Zyt. Numme mängisch sy es paar glychzytig. Usserdäm spilt dr Bundesrat by Aaglägeheite vor EU e Rolle.

Preußisches Herrehuus, Sitz vom Bundesrat, ir Leipziger Straß

Blick i de Vorhof vom Preußische Herrehuus

Sitz

Dr Bundesrat isch syt em Jahr 2000 im früerige Preußische Herrehuus z Berlin. Vorhär isch är (ab 1949) im Bundeshuus z Bonn gsy. Im Jahr 2000 isch d Bundeshouptstadt vo Dütschland nid meh Bonn, sondern Berlin gsy. Da sy fasch alli Regierigsyrichtige u anderi Verfassigsorgane mit irne Büro uf Berlin züglet.

Ufgaabe u Befugnisse

Dür de Bundesrat würke nach de Vorschrifte vom Grundgsetz (Artiku 50) „d Länder by de Gsetzgebig u Verwaltig vom Bund und i Aaglegeheite vor Europäischi Union“ mit. Wägem Artiku 79 cha disi grundsätzlichi Mitwürkig nid emau dür e Änderig vom Grundgsetz abgschaft wärde. Däm seit me uf Hochdütsch „Ewigkeitsklausel“.

Nid alli Gsetz bruuche d'Zuestimmig vom Bundesrat. Aber dä Aateil vo zuestimmigspflichtige Gsetz isch able no übr 50 Prozänt aagstige. Villicht ou wäg dr Rächtsprächig vom Bundesverfassigsgricht. Ursprünglech het me d Mitwürkig vom Bundesrat by de Gsetz wäg dr Erfahrig vo de Länder ygführt. Schließlech hets die ja scho viu früecher als d Bundesrepublik gäh, es sy de halt Fürschtetümer gsy. Inzwüsche isch disi Mitwürkig allerdings ou wägem Inhalt vo de Gsetz no da.

Parteipolitik spilt by däm ou a großi Rolle. So chame vermuete, dass zum Bispil d großi Koalition us CDU/CSU und SPD byr Föderalismusreform 2006 d Kompetänze meh a d Länder hei abgäh, wil fasch alli Bundesländer vor CDU regiert wärde. Auso isch es ke Machtverluscht. Gnauso het o Gsetzesentwürf vor letschte Rot-grüeni Regierig gäh, wo bym Bundesrat ke Zuestimmig übercho hei, wil dert fasch nummer Lüt vor CDU gsässe sy. Und ganz ähnlichi Gsetz wärde jitz vor neue CDU-Regierig vorgschlage und überchöö natürlech d zuestimmig.

2004 het d Föderalismuskommision probiert, dä Aateil vo zuestimmigspflichtige Gsetz z'sänke, hets de aber glych verjuflet.

Weblink