Morin-Heights
Morin-Heights | |
|---|---|
Dorp | |
 Die middestad van Morin-Heights | |
  Morin-Heights | |
| Koördinate: 45°54′00″N 74°15′00″W / 45.90000°N 74.25000°W | |
| Land |  Kanada |
| Provinsie | Quebec |
| Region | Laurentides |
| Regionale County | Les Pays-d'en-Haut |
| Stigting | 1850 |
| Stadstatus | 1 Julie 1855 |
| Regering | |
| • Burgemeester | Timothy Watchorn |
| Oppervlak | |
| • Totaal | 59,4 km2 (22,93 vk. myl) |
| • Land | 56,47 km2 (21,8 vk. myl) |
| Bevolking | |
| • Totaal | 3 925 |
| • Digtheid | 69,5/km2 (180/vk. myl) |
| Tydsone | UTC-05:00 (EST) |
| • Somertyd | UTC-04:00 (EDT) |
| Poskode | J0R 1H0 |
| Skakelkodes | 450 en 579 |
| Webwerf | morinheights.com |
Morin-Heights is 'n sport- en ontspanningsoord met sowat 3 900 inwoners in die Pays-d'en-Haut-streeksmunisipaliteit, Quebec, Kanada. Die nedersetting, wat na die advokaat, joernalis en politikus Augustin-Norbert Morin vernoem is, is een van die bekendste toeristebestemmings in die Laurentides-bergstreek.
Geskiedenis
[wysig | wysig bron]Die gebied van Morin-Heights was voor 1850 nog onbewoon, en slegs enkele Indiaanse jagters het deur die streek beweeg. Toe die regering die gebied in daardie jaar deur minister Augustin-Norbert Morin laat opmeet het, is dit as geskik vir kolonisasie geag. Morin het destyds bystand aan setlaars verleen wat bereid was om hulle hier te vestig en het ook self land in die gebied gekoop. Nog in dieselfde jaar het die eerste drie setlaars, die gebroeders Seale uit Connaught in Ierland, hier aangekom.
Gaandeweg het meer immigrante uit Ierland en Skotland asook Franssprekende Kanadese hulle in die streek gevestig, alhoewel die lewensomstandighede in Morin-Flats (soos die dorp oorspronklik genoem is) vanweë die rotsige grond aanvanklik nog baie moeilik was. Potas, wat uit gekapte en verbrande boomstamme ontgin is, was die belangrikste bron van inkomste vir die vroeë setlaars. Later is die eerste graan- en saagmeule opgerig. Bosboubedrywighede langs die plaaslike Simonrivier het dekades lank talle werkgeleenthede aan die plaaslike gemeenskap verskaf.
Eers met die voltooiing van die eerste spoorwegverbinding in 1895 is die natuurskoon van die omgewing vir toerisme ontsluit. Stadsbewoners het begin om vir hulself vakansiehutte langs die oewers van plaaslike mere te bou. In 1911 het die bewoners besluit om die dorpsnaam na die meer aantreklike Morin-Heights te wysig.
In die 1930's het skisport baie gewild in Noord-Amerika geword. Op naweke het honderde skitoeriste per trein na Morin-Heights gereis, en steeds meer toerismegeriewe is ontwikkel. Treinvervoer is in 1962 gestaak nadat die Laurentides-snelweg geopen is en die meeste besoekers met hul eie motors na die skigebied gery het.
Die plaaslike bevolking het in die 1960's danksy jong Amerikaners gegroei wat diensplig gedurende die Viëtnam-oorlog met hul immigrasie na Kanada vermy het. Morin-Heights het sodoende 'n kosmopolitiese karakter begin ontwikkel en staan sedertdiuen bekend vir sy kuns- en musieklewe.