Leica
| Leica Camera AG | |
  | |
| Tipe | AG (Duitse aandelemaatskappy) |
|---|---|
| Gestig | 1849 / 1986 |
| Hoofkantoor | Wetzlar, Duitsland |
| Industrie | Optiese bedryf |
| Produkte | Digitale kameras, verkykers |
| Inkomste | 296,8 miljoen € (fiskale jaar 2011/12) |
| Werknemers | 1300 (2012) |
| Webwerf | www.leica-camera.com |
Leica Camera AG (Leica is 'n afkorting van Leitz(sche) Camera) is 'n belangrike Duitse maatskappy in die optiese bedryf wat hom op die vervaardiging van kameras en verkykers toegespits het. Die huidige aandelemaatskappy Leica Camera AG het in 1986 uit die Ernst Leitz Wetzlar GmbH ontstaan. Die GmbH of beperkte maatskappy het teruggegaan op 'n ouer onderneming, die Optische Institut, wat deur Carl Kellner in 1849 in Wetzlar in die huidige Duitse deelstaat Hesse gestig is.
Geskiedenis
[wysig | wysig bron]Reeds in 1849 het Carl Kellner sy Optische Institut in die Hessiese stad Wetzlar gestig. Hierdie ondernemng is deur Ernst Leitz in 1869 uitgebou tot die Ernst Leitz Werke, 'n maatskappy wat hom net soos die Optische Institut aanvanklik op die vervaardiging van mikroskope toegespits het.
Omstreeks 1900 het Leica die produkreeks uitgebrei met 'n verskeidenheid ander optiese toestelle soos verkykers, episkope, epidiaskope en professionele filmkameras. In dié konteks is ook 'n miniatuurkamera ontwikkel waarin klein strepies van die destyds gebruiklike 35mm-film as toets belig kon word. Dit was nou nie meer nodig om die groot kamera se hoofmagasyn te open om die destyds nog noodsaaklike beligtingstoetse te doen nie.
Dié konstruksie het as basis vir die eerste kleinbeeldkamera gedien wat deur Oskar Barnack in 1914 ontwikkel is - die sogenaamde Ur-Leica wat Barnack as mik-en-druk-kamera op sy privaat staptoere saamgeneem het.
In 1920 het Leitz se seun Ernst Leitz II die bestuur van die maatskappy oorgeneem en in 1924 die besluit geneem om ondanks die destydse moeilike ekonomiese situasie in Duitsland met die grootskaalse vervaardiging van 'n kleinbeeldkamera te begin. Die kamera het op 'n konstruksie deur Oskar Barnack, 'n medewerker, gebaseer en was geskik vir die gebruik van 35-millimeter-kleinbeeldfilms wat destyds ook in rolprentteaters ingespan is. Hierdie eerste Leica-kamera het 'n groot en onverwagte sukses behaal.
Die Ernst Leitz GmbH is nie deur die Tweede Wêreldoorlog geraak nie en het onmiddellik ná die einde van die oorlog weer met die vervaardiging van sy produkte begin. Toe die twee Hessiese stede Wetzlar en Gießen as gevolg van 'n administratiewe hervorming tydelik tot 'n nuwe stad (Lahn) saamgesmelt is, het die maatskappy sy naam gewysig na Ernst Leitz Wetzlar GmbH om sodoende nie die bekende naam Wetzlar kwyt te raak nie.
In 1986 is die maatskappy in drie onafhanklike ondernemings opgesplits - Leica Camera AG, Leica Microsystems GmbH en Leica Geosystems AG. Die Leica Camera AG het sy hoofkwartier vervolgens van Wetzlar na Solms verskuif. Die verdere ontwikkeling van die naam Leica is deur die geskiedenis bepaal. In 1987 is die Ernst Leitz Wetzlar GmbH deur die Wild Heerbrugg AG oorgeneem. Die nuwe onderneming, Wild Leitz Holding AG, het in 1990 met The Cambridge Instrument Company plc saamgesmelt om die maatskappy Leica Holding B.V. te vorm. Die naam Leica is sodoende ook met die leidende vervaardiger van mikroskope, opmetings- en fotogrammetriestelsels en opties-wetenskaplike instrumente vereenselwig.
Sedert 1996 is die Leica Camera AG as 'n aandelemaatskappy op die effektebeurs genoteer. Die Leica-kamerastelsel word in Duitsland en Portugal vervaardig, terwyl kompakte analoë kameras ook in Asië geproduseer is. Leica het 'n tyd lank met die Japannese maatskappye Minolta en Fuji saamgewerk, maar koöpereer tans met Matsushita/Panasonic.
In die lente van 2005 het die Leica Camera AG met sy finansiële moeilikhede internasionale nuus gemaak. Die Franse vervaardiger van luukse-artikels Hermès het in November 2006 sy belange in Leica (36,2 persent van die aandele) aan die Oostenrykse maatskappy Salzburger Holding ACM Projektentwicklung ('n volfiliaal van die Oostenrykse beleggersfamile Gebroeders Kaufmann se Sokrates-privaatstigting). Die Kaufmanns het reeds vanaf Augustus 2004 aandele van Leica Camera gekoop. Hermès het nogtans omskepbare obligasies van Leica Camera ter waarde van 7,5 miljoen € behou.
ACM het sodoende voorlopig 88 persent van Leica se aandele gehou en sy belange in dié maatskappy tot by die einde van 2007 tot sowat 96,5 persent vergroot. ACM het vervogens bekend gemaak dat hulle van plan was om Leica volledig te oorneem. Die algemene vergadering van aandeelhouers het in November 2007 besluit om die minderheidsaandeelhouers deur middel van 'n gedwonge squeeze-out skadeloos te stel. Die Leica Camera AG word sedert Oktober 2012 nie meer aan die effektebeurs genoteer nie.
