Ytringen (avis)

Ytringen publiserer på ulike digitale flater. I 2018 byrja Ytringen å lage nettavis. Samstundes blei betalingsmur for ikkje-abonnentar teke i bruk. I 2020 gjorde redaksjonen dei første forsøka på å lage podkast om aktuelle tema.

Ytringen er namnet på avisa for Ytter-Namdalen. Det var gründeren og forfattaren Egil Hyldmo som grunnla avisa. Han gjorde på førehand ei marknadsundersøking for å sjå om det kunne vere grunnlag for eit blad i dette området. Han skipa òg til ein namnekonkurranse. Ytringen fanga opp i seg både det geografiske og ideen om at avisa skulle vere eit talerøyr for lokalsamfunnet. Avisa dekte i byrjinga kommunane Fosnes, Nærøy, Vikna og Leka i Nord-Trøndelag og Bindal i Nordland.

Egil Hyldmo kom frå redaktørstillinga i Stjørdalingen. Første nummer av Ytringen kom 31. august 1982. Våren 1982 hadde Hyldmo gitt ut eit prøvenummer, ei stor avis på 48 sider. I 14 dagar hadde han og medspelarane samla stoff og annonsar. Annonsetilgangen var god, og annonsane gav driftskapital i startfasen.

Avisa blei først trykt i Brønnøysund, seinare i Trondheim og Namsos, og nå til slutt på Orkanger. I byrjinga var det ein journalist, ein kontormedarbeidar og ein deltidsseljar, ved sida av redaktør Hyldmo, som òg var disponent og annonseseljar. I tillegg skaffa dei seg eit nett av frilansarar i alle kommunane.

Ulike lag blei engasjerte til å selje abonnement. Ved første årsskiftet var talet på tingarar over 3000. Avisa blei altså godt motteken. I distriktet hadde det før kome ut avis i Rørvik, men den var slått saman med Nordtrønderen og Namdalen i Namsos. Det var behov for ei ny avis for Ytter-Namdalen, der folk var vane med å ha eiga avis.

Ytringen etablerte også ein nærradio, Radio Ytringen, eit namn som Språkrådet gav pris for. Ytringen hadde redaksjonsfilial i Rørvik, der dei laga stoff både til radio og avis. Ei tid dreiv dei òg papirhandel i same huset som avisa heldt til i på Kolvereid. Frå 1984 fekk dei eiga teknisk avdeling.

Avisa kom i alle år frå 1982 til 2020 ut to dagar i veka i papirformat. Utgjevingsfrekvensen på papir blei då endra til ein dag i veka.

I 1993 selde Hyldmo Ytringen til Trønder-Avisa i Steinkjer. Seinare har Helgelands Blad kome inn som største eigar, med 49 prosent, medan Trønder-Avisa sat med 47 prosent av aksjane fram til 2016. Då selde dei aksjane til medieinvestoren Odd Reidar Øie.

Til og med 2015 gjeld opplagstala for papirutgåva. Frå 2020 blir det brukt netto opplagstal for både digitale abonnement og papirabonnement. Kjelda er opplagstala avisene rapporterer til Mediebedriftenes Landsforening (MBL) for andre halvår.

• Første nummer 31. august 1982

• norsk presses historie
• lokalavis

• Ytringen