Lingua greca antica
| Grecu anticu | |
|---|---|
| Fu parratu 'n: | Grecia, Sicilia, Magna Grecia, Roma antica, Macidonia, Cipru, Albania, Bulgaria, Turchia, Crita, Palistina, Cirinàica e ntî tutti l'àutri zoni unni li Grechi àppiru putiri e pristìggiu |
| Classìfica: | - |
| Famigghi linguìstichi: | Lingui indoeuropei |
| Classificazzioni | |
| ISO 639-1 | - |
| ISO 639-2 | grc |
| SIL | GRC |
Lu Grecu anticu ('n grecu anticu ἡ Ἕλλην διάλεκτος) è lu nomu di la famigghia di lingui parrati 'n Grecia, di lu 1100 a.C. a lu 600 a.C. Lu sò alfabbetu è lu patri d'ogni l'alfabbetu di li lingui rumanzi. Lu grecu anticu è nu stadiu stòricu di lu prucessu evulutivu di la lingua greca.
Storia
[cancia | cancia la surgenti]Lu grecu anticu veni doppu di lu Micineu (II millenniu a.C.) e prima di lu grecu ellinìsticu, annincatu comu Koiné o grecu bìbblicu, d'unni appui addiveni lu grecu bizzantinu.
Lu grecu anticu hà statu una di li lingui cchiù mpurtanti ntî la storia di la cultura di l'umanitati: hà statu la lingua di Omeru e hà statu la lingua di li primi filòsufi e scrittori di l'Uccidenti.
Palori di lu grecu anticu foru addupirati di li rumani e tràmiti chisti agghicaru nzinu a li nostri jorna. La Numinclatura binuminali, ccu tuttu ca era diciuta in latinu, pigghia assai cosi di lu vucabbulariu di lu grecu anticu. Assai palori, comu "dimucrazzìa", nasceru ntî la Grecia antica e agghicaru a li jorna nostri.
Lu grecu antica era, comu lu grecu mudernu ca è la sò naturali evuluzzioni, na lingua indueurupea li cui urìggini sunnu ancora oi difficili d'allustrari: li diversi tipuluggìi di li lingui grechi ca vinìanu parrati ntî la Grecia, avìanu na cumuni ràdica ca li linguisti annincaru comu "Protugrecu", ca cc'era prima di la migrazzioni dòrica ntî l'area balcànica. Jiri a rintrazzari nu pricidenti antinatu arrisurta, ppi causa di la mancanza di testi scrivuti, assai arduu, ma pari putiri cunzidirari na stritta cumunioni di ràdichi di lu grecu anticu ccu la lingua armena, parrannu accussì di prugginituri cumuni annincatu "grecu-armenu".
Si pò pinzari ca lu protugrecu avissi pirdutu la sò unitati linguìstica a lu tempu di la migrazzioni dòrica, 'n sècutu a cui, ntî nu pirìudu ntra lu XIII sèculu a.C. e lu XI sèculu a.C., cci fu nu sviluppu d'assai varianti di lu grecu anticu, arricurdati comu "dialetti grechi". Li primi attistazzioni di lu grecu anticu sunnu di lu VIII sèculu a.C. ccu lu sviluppu di nu difinitivu alfabbetu.
La pirduta di l'unitati linguìstica porta a lu sviluppu di diversi varianti di grecu ca currispunni a la spartuta di lu pòpulu grecu anticu: Dòrichi, Eòlichi e Iònichi, ugnunu ccu nu sò dialettu, ccu carattirìstichi particulari, ma tantu simigghianti ca si ponnu capiri ntra d'iddi.
Ancora oi lu grecu anticu è studiatu ntî cirtiduni scoli sicunnarii uccidintali, anzèmmula a lu latinu: asempii sunnu lu Liceo Classico 'n Italia, l' Humanistisches Gymnasium ntî la Girmania e li Grammar Schools ntî lu Regnu Unitu. 'N Italia 'n particulari, veni studiatu di lu 8-9 % di l'alunni di li scoli suprajuri (tutti chiddi ca sunnu scrivuti ntî li licei classici), la purziuni cchiù àuta ntra li paisi uccidintali. Sempri anzèmmula a lu latinu, lu grecu anticu è materia di studiu ntî l'Univirsitati, ntî li facultati di Littri Clàssichi.
Alfabbetu grecu
[cancia | cancia la surgenti]
L'alfabbetu grecu è furmatu di 24 littri:
| Nomu | Majuscula | Minùscula |
|---|---|---|
| alfa | Α | α |
| beta | Β | β |
| gamma | Γ | γ |
| delta | Δ | δ |
| epsilon | Ε | ε |
| zeta | Ζ | ζ |
| eta | Η | η |
| theta | Θ | θ |
| iota | Ι | ι |
| kappa | Κ | κ |
| lambda | Λ | λ |
| my | Μ | μ |
| ny | Ν | ν |
| csi | Ξ | ξ |
| omicron | Ο | ο |
| pi | Π | π |
| ro | Ρ | ρ |
| sigma | Σ | σ (ς a la fini di na palora) |
| tau | Τ | τ |
| ypsilon | Υ | υ |
| phi | Φ | φ |
| chi | Χ | χ |
| psi | Ψ | ψ |
| omega | Ω | ω |