Calcopirita
La calcopirita es un minerau jaune laton amb de patinas d'alteracion iridescentas. D'una duretat situada entre 3,5 e 4 e d'una densitat compresa entre 4,1 e 4,3, es compausada de sulfur de coire e de fèrre CuFeS2 que forma de cristaus bisfenoïdics evocant una morfologia pseutetraedrica. Pasmens, coma per la màger part dei mineraus metallics, lei cristaus son fòrça rars dins la natura e la calcopirita se presenta sovent sota forma de massas microcristallinas. Son esclat es metallic, es soluble dins l'acid nitric (amb formacion de sofre) e es pas fluorescenta. Una autra caracteristica es son ponch de fusion bas, mai son caufratge libèra de vapors sofradas.
Geologicament, la calcopirita se forma dins lei venas pegmatitas e dins lei venas idrotermalas de temperatura auta. Es generalament associada amb la pirita, la bornita, la molibdenita, la calcosita e l'aur natiu. Lei jaciments principaus se situan en Canadà, ais Estats Units, en Chile, en Zambia, en Alemanha e dins lei Monts Orals. En Occitània, lo jaciment principau se tròba a Reialmont[1], mai es pas un minerau rar e sa preséncia es frequenta coma minerau segondari d'una vena. Es lo minerau de coire pus esplechat dins lo mond.
Liames intèrnes
modificarBibliografia
modificar- (fr) Nicola Cipriani (trad. Marie-Hélène Alfonsi e Catherine Sobecki), Minéraux et Roches, París, Gründ, 1996.