Versilia

La Versilia (Ersìlia o Ersìglia 'n lumbart oriental; Versilia in lumbart ocidental) l’è ü tòch de riviera o de còsta de mar che la taca a mut (nòrd) apéna sóta Marina de Masa, che però l’è mia Ersilia e l’è ‘n pruìnsa de Masa Carara, e la ria a mesdé (sud) fina a Torre del Lago ‘n pruìnsa de Luca o ach fina a la Bocca d’Arno ‘n pruìnsa de Pisa.

La Ersilia ésta dal mar e de dré i Alp Apuane

La Ersìlia del turismo e la Ersìlia stòrega

Gh’è dò tipi de Ersilia, chèla del turismo che la gh’à sö la còsta i paìs de:

• Forte dei Marmi che l’ fà cümü desperlü,
• Marina de Pietrasanta che l’è ‘l tòch söl mar de Pietrasanta,
• Lido di Camaiore che l’è ‘l tòch söl mar de Camaiore,
• Viareggio che l’ fà cümü desperlü.

e quach chilòmeter de luntà del mar gh’è i cümü de Pietrasanta, de Camaiore e la frasiù de Torre del Lago che l'è in del teritòre de Viareggio.

E pò gh’è la Ersìlia stòrega, ‘ndóe i tróa pòst dóma Marina di Pietrasanta e Forte dei Marmi söl mar e apéna dré al mar Pietrasanta e Serravezza per rià sèmper piö de luntà dal mar fina a i paìs a i pé di Alp Apuane: Cardoso, Farnocchia e Stazzema.

Chèsta Ersilia l’è chèla che la se tróa 'ntùren al torènt Versilia. Viareggio l’è fò da chèsta Ersilia e de fati l’è ciamada da i versiliani doc la capitàl abusiva de la Ersilia.

Turismo de sciòre

La Ersilia l’è ü pòst de mar pròpe famùs e cognusìt ‘n töt ol mónt, per ès piö precìs suradetöt Forte dei Marmi e Viareggio i è famùs e cognusìcc, tat che d’estàt i vé ‘n vacansa in chi dù paìs ché tace vip; insóma i è di pòscc de sciòre.

La Ersilia l’è isé famusa ach grasie a di film che i è stai giràcc pròpe a Forte dei Marmi compàgn de Sapore di Sale con di atùr compàgn del Jerry Calà.

I spiage

La spiagia de la Ersilia l’è töta de sabia fina e zaldina e l’è granda, ma pròpe granda, tat che cóme negót ghe sarà tra i 100 e i 150 méter de spiagia tra ‘l mar e ‘l lungomàr.

De sólet i stabilimènc balneàr i ghà de prensépe la cà del concesiunàr de l’istabilimènt che da la banda del lungomàr la pöl iga pò di negòse. Lé apröf gh’è pò l’öfese del concesiunàr, ol bar, i cabine, i bagn, i dòce, i zöch per i s-cetì e ‘n di bagn piö bèi pò la piscina. A ‘ndà ‘nacc gh’è alméno 20 file de ombrelù e se stà bèi larch, mia schisàcc e tacàcc ü co l’óter, e pò denàcc a la prima fila gh’è amò alméno 30 mèter de spiagia, ‘ndó ghe stà ‘l bagnino.

Suradetöt a Marina di Pietrasanta, ‘ndóe la spiagia l’è amò piö granda, gh’è ach ol pòst per i machine e de sólet i gh’è da i 20 a i 40 machine per stabilimènt parchegiade sö la spiagia.

Ol mar

L’aqua l’è basa, ma pròpe basa per tace méter, per i prim 20 méter de sólet la ria piö o méno al zenöcc; s’pöl ‘ndà ‘n là ‘n del mar per 50 – 100 méter e se tóca amò e ‘l fónt l’è töt de sabia. L’aqua l’è ciara, ma apéna i unde i vé ü falì piö fórte o apéna gh’è tata zét ‘n aqua, söbét la é tróbia.

La pista di bici

In banda al lungomàr gh’è öna bèla pista per i bici che la à da Forte dei Marmi zó ‘nfina a Viareggio e la biciclèta l’è ‘l ideàl per möès ‘n Versilia.

I Alp Apuane e ‘l lach de Massaciuccoli

A matina (est) de la Ersilia gh’è i Alp Apuane a mut (nord), che i si èt bè dal mar, e gh'è pò 'l lach de Massaciuccoli che l'è piö a mesdé (sud).

I locai

La Ersilia l’è piéna de dèi locài, de balère e de discoteche, quase sèmper sö la spiagia e 'l piö famùs de töcc l’è la Capannina di Franceschi a Forte dei Marmi.

Gh’è pò ol Seven Apple, la Bussola e 'l Twiga a Marina di Pietrasanta, ol Terrazza Inside al Lido di Camaiore.

Per girà i lòcai gh’è pò ol Versilia Night che l’è ü pülman che l’ gira töta la nòcc ‘nfina a la dé da Forte dei Marmi ‘nfina a Viareggio.

Ol sito internet

• www.versilia.org