Sub

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

De mergele kèrk van Sub

Sub of Suub (Nederlands: Sibbe) is e dörp in de gemeinte Valkeberg aan de Geul in Nederlands Limburg. De luuj van Sub zègke zelf "Suub" tege hun dörp, terwiel me in de res va Limburg meistal "Sub" detege zaet, wat ouch de sjpelling volges Veldeke is. In Sub kalle ze Subs, dat ies óngevaer 't zelfde es 't Valkebergs van boete de paort.

Besjtuurlik haet Sub ièwelank bie Oud-Valkeberg gehuèrd. In Sub sjtóng ouch 't raodhoes van de gemeinte Oud-Valkeberg, dat woort later 't oud greun kruusgeboew. Dao sjteit noe de St.Rosa-den die eder jaor in augustus, mit de kèrmes geplant weurt.

De mergele kèrk van Sub is gewiejd aan de heilige Rosa van Lima. Bies 1844 huèrde Sub en Iezere ouch bie de parochie Oud-Valkeberg; doe woort in Sub 'n kapel geboewd ónder arsjitek T. Dumoulin. Vanaaf 1866 woort de kèrktore geboewd door dezelfde arsjitek. De kèrk woort oetgebreid in 1927 nao 'n óntwerp van J. Beurskens. Tot 1948 waor de kèrk rectoraatskèrk, denao woort Sub 'n zelfsjtendige parochie.

't Subberhuuske

't Belangriekste geboew van Sub is 't Subberhuuske (ouch waal Villartshoof geneump) , 'ne hièrehoof oet de 16e ièw. 't Geboew haet sjpeklaoge en 'ne hooktore en is geboewd in Maaslandse Renaissance-sjtiel. In de loup van d'n tied is 't Subberhuuske bewoond gewaes door versjillende adellike families. Ouch tegewoordig is 't geboew es woonhoes in gebruuk door de familie Bennen.

Dialek

't Subber dialek huèrt bie 't Valkebergs. Dao zint e paar oetsjpraokversjille. In 2013 woort door 't historisch Genootschap Sibbe-IJzeren 'n book oetgegaeve mè es titel: Sibbe-IJzeren woorden, mensen, beelden, woa-in opgenómme 'n oetgebreide lies mèt typische weurd, oetdrökkinge en idioom oet Sub.

Dörpsvereiniginge

• Harmonie Sint Rosa
• Zangvereiniging Eendracht
• Dameskoar Suub
• Carnavalsvereiniging de Böschule
• Jónkheid Suub-Iezere 1993
• SV Sibbe

Bekènde inweunersj

• Roy Willems, zenger van dialekmuziek
• De breursj Ger en Huub Harings, oud-coureurs (fietsrennersj)

Extern linke

• Harmonie Sint Rosa
• Joonkheid Suub-Iezere
• SV Sibbe
• Roy Willems