Lege comun
Lege comun, acc lege anglosason, refere a un sistem de legal en cual desides par cortes es atestada clar como "lege" a un funda egal con leges adotada en la prosedes de la corpo de legi e con regulas declarada par la corpo dirijente. La "prinsipe de presedente" o stare decisis (latina: "sta par desides") sinifia ce desides par cortes plu alta obliga cortes plu basa, e desides futur de acel mesma corte, per serti ce casos simil ateni resultas simil. En contrasta, en sistemes de lege sivil, leges creada par la lejeria es tipal plu detaliosa, e desides par judores es plu corta e min detaliada, car la judor o legor es sola scrivente per deside la sola caso, en loca de furni razona cual pote gida cortes futur.
Lege comun ia orijina en England e ia es eritada par cuasi tota nasion a un ves liada a la Impero Brites (estra Malta, Scotland, la stato de Louisiana en la SUA, e la provinse de Quebec en Canada. En England medieval, la leges ia varia contia a contia, fundida sur costumes tribal variosa. La conseta de un "lege comun" ia developa en la rena de Henry 2 en la sentenio 12 tarda, cuando Henry ia asinia judores cual ia ave la autoria per crea un sistem normalida e unida de "lege comun" per la nasion.
La paso seguente en la evolui de lege comun ia veni cuando Re John ia es forsada par sua barones per suscrive a un testo cual ia limita sua autoria per crea leges. Esta Magna Carta ("constitui grande") de 1215 ia comanda ance ce la judores cual atende la re ia debe ave sua cortes e judis a "un loca spesifada", en loca de furni sua judis autocrata en locas nonpredisable sirca la pais. Un grupo de judores consentrada e elite ia ateni un rol dominante en la crea de leges su esta sistem e, comparada con sua corespondentes european, la juderia engles ia deveni multe sentida. En 1297, per esemplo, cuando la corte plu alta en Frans ia ave 51 judores, la corte de suplica comun e England ia ave 5. Esta juderia potiosa e bon liada ia resulta en un prosede sistemida de developa lege comun.
Ma la sistem ia deveni tro plu sistemida, tro rijida e nonflexable. Como un resulta, pos alga tempo, cuantias cresente de sitadanes ia suplica a la re per supresa lege comun, e, per la re, la Senior Canselor ia dona judis ce on debe fa cual ia es justa en un caso. De la tempo de Thomas More, la prima legor cual ia es asiniada la rol de Senior Canselor, un corpo sistemal de justa ia eleva longo la lege comun rijida, e la developa sua propre corte de canseloreria. A prima, justa ia es frecuente criticada como acaso, ce lo ia "varia seguente la longia de la pede de la conselor". Pos un tempo, cortes de justia ia developa prinsipes solida, spesial su Senior Eldon. En la sentenio 19 en England, e en 1937 en la SUA, la du sistemes ia es fusada.
En la developa de lege comun, scrives par eruditas ia ave sempre un rol importante, per la colie de prinsipes incluinte de la leges diversa de casos, e per debate per cambias. William Blackstone, de sirca 1760, ia es la erudita prima cual ia colie, descrive, e ensenia la lege comun. Ma simple par descrive, eruditas ci ia xerca per esplicas e strutures fundal ia cambia lente la modo en cual la lege ia opera en la mundo dial.