Dräikinneksdag

Liturgescht Joer
Advent Chrëschtdag Epiphanie (≈ Dräikinneksdag) Äschermëttwoch Faaschtenzäit Gréngen Donneschdeg Karfreideg Karsamschdeg Ouschteren Christi Himmelfaart Päischten Erläichendag Transfiguratioun Léiffrawëschdag Hellegt Kräiz-Fest Allerhellegen Allerséilen Christus Kinnek

Dräikinneksdag ass de 6. Januar. Um 13. Dag no Chrëschtdag feieren d'Chrëschten d'Epiphanie ((la) epiphania domini), d. h. d'Siichtbarginn vu Gott am Jesuskand dat op Chrëschtdag gebuer gouf. Dëst kënnt an der Liturgie zum Ausdrock am Text Mt 2,1-13a an deem Geléiert aus dem Oste bei d'Jesuskand kommen, him Kaddoe bréngen an an him de Messias erkennen. D'Traditioun huet aus de Geléierten aus dem Osten dräi Kinneke gemaach, déi allen dräi e verschiddenen Alter hunn (e Jonken, en Erwuessenen an en Eeleren) an nach méi spéit aus dräi Kontinenter (Europa, Asien an Afrika) sollte sinn a fir déi ganz (deemools bekannt) Mënschheet stoe sollten.

Feierdag

De 6. Januar ass e gesetzleche Feierdag an Andorra, Éisträich, Griicheland, Island, Finnland, Kroatien, Liechtenstein, Polen, San Marino, Schweden, Spuenien, an der Slowakei an op Zypern.

An Däitschland ass de 6. Januar nëmmen a Baden-Württemberg, Bayern an a Sachsen-Anhalt e gesetzleche Feierdag, an der Schwäiz nëmmen an de Kantone Schwyz, Tessin an Uri an och an e puer Gemengen am Kanton Graubünden.

A Georgie gëllt de julianesche Kalenner an do ass den 19. Januar, deen als Dag vun der Epiphanie zielt, e gesetzleche Feierdag.

Bräich

En Dräikinnekskuch mat enger Kroun

Dräikinnekskuch

Den Dräikinnekskuch ((fr) galette des rois) deen op dësem Dag opgedëscht gëtt, geet op de Brauch zeréck, datt den Owend virum 6. Januar bannent der Famill e Mann zum Kinnek an eng Fra zur Kinnigin bestëmm goufen. Fir dësen Zweck gouf eng schwaarz (Kinnek) an eng wäiss (Kinnigin) Boun am Kuch matgebak. De Kinnek an d'Kinnigin ware verflicht, hir Leit ze bekäschtegen. Haut ginn d'Boune gewéinlech duerch eng kleng Porzeläinsfigur ersat, an den eigentlechen Zweck ass deene meeschte wuel net méi bekannt. Deen, deen d'Boun a sengem Stéck Kuch huet, gëtt Kinnek oder Kinnigin an däerf sech d'Kroun opsetzen.

De Brauch vum Dräikinnekskuch gëtt et an dëser oder enger änlecher Form ë. a. a Frankräich, an der Belsch, a Spuenien, Portugal, Brasilien an a Mexiko.

Dräikinnekssangen

Dräikinnekssangen ass e Brauch, bei deem op Dräikinneksdag dräi Mënschen, déi als Helleg dräi Kinneke verkleet sinn, vun enger Dier bei déi aner heesche ginn, an dat fir e gudden Zweck.

 Méi Informatioun doriwwer am Artikel: Dräikinnekssangen.

Kuckt och

• Helleg dräi Kinneken

Um Spaweck

Commons: Epiphanie – Biller, Videoen oder Audiodateien