Geowëssenschaften

D'Geowëssenschaften ëmfaassen all d'Wëssenschaften, déi sech mat der Äerd beschäftegen.

Bei der Geowëssenschaft ginn d'Kenntnesser an d'Methode vun de Basiswëssenschafte Physik, Mathematik, Astronomie, Chimie a Biologie ugewannt. D'Geowëssenschafte sinn zimmlech fächeriwwergräifend a kënne ganz schwéier agegrenzt ginn. Doduerch gëtt et keng eendeiteg Definitioun.

Déi eenzel Sektiounen

Ekonomiegeologie

D'Ekonomiegeologie benotzt op der Sich no ekonomesch wäertvolle Réistoffer, nieft klassesche geologeschen Techniken, wéi d'Andeelen a Prouwen huelen um Terrain, och d'Methode vun der Geochimie, Geophysik a Fernerkennung. Zur Klärung vun der Genese vu Lagerplazen ass besonnesch d'Virstellung iwwer de Floss vun ënnerierdeschen, mineraliséierte Léisungen (Fluid) wichteg. D'Biergbaugeologie benotzt bei der Sich an der Exploitatioun vun Äerzlageren Erkenntnesser vun der Tektonik an der Strukturgeologie. Bei der Sich no fossilem Brennmaterial, wéi och no netmetalleschem Réimaterial, brauch ee Kenntnesser aus der Paleontologie (haaptsächlech Mikrofossilien) a Sedimentologie.

Fernerkennung

D'Fernerkennung ass een interdisziplinaart Instrument fir d'Datebeschafung duerch Loftbildopnamen a Fernerkennungssatelitte fir bal all Beräicher, déi hei opgefouert sinn.

Fotogrammetrie

Fotogrammetrie bedeit d'Rekonstruktioun vun Zeechnunge a vu Géigestänn (hei vun der Äerd- oder Buedemuewerfläch) an dräidimensionaler Form (z. B. eng perspektivesch Zeechnung vun enger Foto).

Geochimie

D'Geochimie befaasst sech mat dem Opbau an der Verdeelung vu cheemeschen Elementer an Isotopen op der Äerd, op anere Planéiten an am Weltraum (Kosmochimie). Ausserdeem erfuerscht si d'Gesetzer vum Matièretransport a -kreeslaf vun de Mineraler an dem Gestengs an der ganzer Äerd.

Geodesie

D'Geodesie befaasst sech mat der Bestëmmung vun der Figur vun der Äerd, hirer Zeechnung a Kaarten a Pläng souwéi dem Vermoossen a Beschreiwung vun der Géigend an de Géigestänn a Bedeitung op der Äerduewerfläch. Deelberäicher vun der Geodesie sinn d'Äerdvermoossen, d'Landvermoossen, d'Kartographie, d'Fotogrammetrie, d'Ingenieurvermoossen an d'Astrogeodesie, déi d'Kenntnesser, d'Mëttel an d'Methode vun der Astronomie fir Vermoossenssaufgaben asetzt.

Geographie

D'Geographie ënnersicht all Virgäng an op der Äerd. Deelberäicher vun der Geographie sinn d'Physesch Geographie an der Anthropogeographie.

• D'Physesch Geographie beschreift d'Gestalt vun der Äerduewerfläch. Zu hiren Deelgebidder gehéieren: Biogeographie, Buedemgeographie, Geomorphologie, Geoekologie, Hydrogeographie a Klimageographie.
• D'Anthropogeographie beschäftegt sech mat der Wiesselwierkung tëscht dem Mënsch an dem geographesche Raum. Zu hiren Deelgebidder gehéieren: Bevëlkerungsgeographie, Ekonomiesgeographie, Historesch Geographie, Kulturgeographie, Politesch Geographie, Siidlungsgeographie, Sozialgeographie a Verkéiersgeographie.

Geoinformatik

D'Geoinformatik setzt sech mam Wiesen an der Funktioun vun der Geoinformatioun, mat hirer Bereetstellung a Form vu Geodaten a mat deenen dorop opbauenden Uwennungen auserneen. Déi dobäi gewonnen Erkenntnesser endegen an der Technologie vun de GEO-Informatiounssystemer.

Geologie

D'Geologie ënnersicht den Opbau vun der Äerd, virun allem d'Gestengs an der Äerdkuuscht. De wichtegste Prinzip vun der Geologie ass den Aktualismus. Am Ufank vun de 60er Joren huet d'Wëssenschaft e risege Fortschrëtt gemaach duerch d'Akzeptéiere vun der Theorie vun der Plackentektonik. D'Schwësterwëssenschafte vun der Geologie sinn d'Paleontologie an déi historesch Geologie. En Deel vun der Geologie ass d'Stratigraphie, déi versicht d'Gestengs chronologesch nom Alter anzedeelen (geologesch Zäitskala). Jee nodeem wéi eng Kennzeechen e Gestengs huet, ënnerscheet een d'Fossil- oder Biostratigraphie, d'Lithostratigraphie, d'Magnetostratigraphie an d'Sequenzstratigraphie.

Geomorphologie

D'Geomorphologie ënnersicht d'Landschaftsformen, déi haut op der Äerduewerfläch existéieren, zesumme mat Klassifikatioun, Eegenheeten, Beschreiwung, Ursprong, Entwécklung an den Zesummenhang vun de geologesche Strukturen.

Geophysik

D'Geophysik ass eng Spart vun der Physik an hëlt physikalesch Prinzippie fir d'Erfuerschung vun der Äerd. Deelberäicher vun der Geophysik sinn d'Seismik, d'Seismologie, d'Gravimetrie, d'Geoelektrik, d'Geothermik (déi versicht d'Hëtzt aus der Äerd als Energieressource auszenotzen), d'Isotopegeophysik, d'Geomagnetik an d'Buerlachgeophysik.

Geotechnik

D'Geotechnik ass en Haaptbegrëff fir d'Disziplinnen am Bauingenieurswiesen, déi sech mat der Grënnung vu Bauwierker am Ënnergrond befaassen.

Hydrologie

D'Hydrologie ass d'Wëssenschaft vum Waasser, vu sengen Eegenschaften a senge Formen op an ënner der Landuewerfläch.

Ingenieurgeologie

D'Ingenieurgeologie ass deen Deel vun der Geologie, deen d'geologesch Verhältnesser am Sënn vum Bauingenieurswiesen ënnersicht. Si befaasst sech z. B. mat der Standfestegkeet vum Ënnergrond vu Bauwierker an och mat der Äerbiewesécherheet. Si spillt och eng Roll bei der Entsuergung an der Vermeidung vun Ëmweltschied.

Kartographie

D'Kartographie ass d'Wëssenschaft, Konscht an Technik vum Erstelle vu geographesche Kaarte fir d'Duerstellung vun der Äerduewerfläch mat all hiren topographeschen, siidlungsgeographeschen, territorialen, infrastrukturellen, sozialen, politeschen, historeschen, geologeschen, tektoneschen an all aner Aspekter.

Klimatologie

D'Klimatologie erfuerscht d'Gesetzméissegkeete vum Klima, also dem duerchschnëttlechen Zoustand vun der Äerdatmosphär a benotzt dobäi statistesch Methoden.

Kristallographie

D'Kristallographie ass eng Materialwëssenschaft a beschäftegt sech mat de physikaleschen Eegenschafte vu Kristaller.

Limnologie

D'Limnologie erfuerscht d'Struktur an de Stoff- an Energiehaushalt vun de Bannegewässer als Ekosystem.

Meteorologie

D'Meteorologie ass d'Wëssenschaft vun den atmosphäresche Phenomeener.

Mineralogie

D'Mineralogie beschäftegt sech mat der Zesummesetzung an der Klassifikatioun vun de Mineraler, wou se hierkommen a mat hirer technescher an wirtschaftlecher Verwennung.

Ozeanographie

D'Ozeanographie ënnersicht d'Stoff- an d'Energiekreesleef an de Weltmierer. D'Planktologie ass eng Verbindung zur Biologie.

Paleoklimatologie

D'Paleoklimatologie versicht unhand vu verschiddenen Daten aus Klimaarchiven déi ënnerschiddlech klimatesch Verhältnesser an der Vergaangenheet ze klären an aus de Réckschlëss Previsioune fir déi klimatesch Zukunft ze maachen.

Paleontologie

D'Paleontologie ass d'Wëssenschaft, déi sech mat de Planzen (Paleobotanik) an Déieren (Paleozoologie) aus der Virzäit beschäftegt. Quellematerial fir d'Paleontologe sinn d'Fossilien.

Pedologie

D'Pedologie ass d'Wëssenschaft, déi sech mam Entstoen, der Entwécklung, de Bestanddeeler an enger Klassifizéierung vum Buedem befaasst. Biedem entstinn duerch physikalesch a cheemesch Verwitterung vu festem Gestengs.

Petrologie a Petrographie

D'Petrologie an d'Petrographie sinn Disziplinnen, déi fest Gestengs ënnersichen. D'Petrographie huet d'Roll fir se ze beschreiwen. Wéinst den Ënnerscheeder beim Entstoe vum Gestengs kann d'Petrologie an dräi Ënnergebidder agedeelt ginn: magmatesch Gestengs, metamorpht Gestengs a Sedimentgestengs.

Petrophysik

D'Petrophysik befaasst sech mat der Bestëmmung vu physikaleschen Eegenschafte vu Gestengsprouwen. Si huet eng besonnesch Bedeitung bei der Bewäertung vu Gestengs fir Pëtrol an Äerdgas.

Tektonik

D'Tektonik befaasst sech mam aktuelle Opbau vun der Äerdkuuscht a mat hire Beweegungen a Stäerkten.

Vulkanologie

D'Vulkanologie ëmfaasst déi vulkanesch Phenomeener op der Äerd.

Um Spaweck

Commons: Geowëssenschaften – Biller, Videoen oder Audiodateien