Kometo Halley
La Kometo di Halley esas la maxim bone konocata kometo di kurta periodo; ol esas reguloze videbla de Tero. Ol esas nomizata por la astronomo Edmond Halley, qua, en 1705, pos konsidero di astronomiala observi di la antea du yarcenti, konstatis ke ula sama kometo aparis ye periodo di 75 o 76 yari.
Olua vizito esis observata e registragata da astronomi de plu kam du mil yari.
Ca kometo ye 66 esis videbla de januaro til aprilo di ta yaro, ed ol havis perceptebla kaudo. Ol esis mencionata da Cassius Dio (Romana konsulo e historiisto, 150–235) e Suetonius Tranquillus (Romana historiisto, 69–122). Li skribis ke, dum la vivo di la imperiestro Vespasianus, kometo aparis dum longa tempo; la Romana populo pensis ke la aparo esas auguro di la morto di Vespasianus.
En 218 la kometo esis videbla, e ye 17 di mayo ol atingis perihelio. Olua aparo esis registrata da Chiniana astronomi; li vidis ol matine dum 20 dii, e pose en la vesperala cielo. Ol esis mencionata da Cassius Dio, qua skribis ke ol efektigis terorigiva pavoro. Esis supozata ke ca aparo di la kometo esis kauzo di la morto di Romana imperiestro Macrinus: pos un yaro en ofico, il perdis populara susteno ed altra imperiestro proklamesis; il esis exekutata en junio 218.