Carlos Sosa
Carlos Sosa Melgarejo niko heñóikuri Jeikoha Trinidad-pe, Táva Guasu Paraguaýpe, Paraguay Retãme; ára 29 jasyrundy ary 1926-pe. Itúva herava'ekue Antolín Sosa ha isýkatu kuñakarai Hilaria Melgarejo. Carlos Sosa niko ñe'ẽpapára, purahéi apohára, puraheihára ha mbaraka mbopuhára. Hera tee niko Pedro; ág̃akatu, ojeherókuri Carlos opa oikohague rupi purahéi myasãime.
Imitã ha imitãrusúpe ojeherókuri avei Chopelo. Imitãrusúpe oha'ãjepékuri vakapipopo Atyha 12 de Octubre, jeikoha Santo Domingo-guápe ha upe rire oha'ãjepékuri Atyha Nacional-pe oikuaahaguépe Arsenio Erico-pe. Oikókuri Jeikoha Pinosãme ha upépe ombojoaju hekove kuñakarai katupyryete Máxima Lugo-re ha iñemoñarekuéra ha'e ko'ãva: Veridiana, Miguel Angel, Marlene Isabel, María de las Nieves ha Nimia Luciana. Kuñakarai Nela Albabi ndive oguerekókuri peteĩ tajýra hérava Nimia Carolina.
Imitãkaria'ývo oñepyrũmakuri ohai iñe'ẽpotymimi ha avei oñepyrũkuri opurahéi. Upe mboyve oikókuri chugui aty mboretia'ehára ha ñoha'ãngára. Upéi, pya'evoi ohechaukáma ikatupyryha purahéipe ha héra oñepyrũ herakuãkuri oparupirei. Heta hembiapokue ha'evoíkuri ohai ha ombopurahéi ha umíva herakuãmombyrýkuri oĩgui heta ñane retã puraheihára omyasãiva'ekue Carlos Sosa rembiapokue ko yvy apére, umíva apytépe, Luis Alberto del Parana. Carlos Sosa opuraheijepékuri ko'ã tetãme: Argentina, Pindorama, Ekuator, Volívia, Chile, Perũ, Kolómbia, Uruguái ha Venesuéla. Ary 1983 ha 1984-pe opurahéikuri Estados Unidos-pe. Hekove pukukuépe oñeme'ẽkuri chupe heta jopói ha ojejapókuri chupe heta jehechakuaa omyasãire ñane retã purahéi.
Hembiapokue apytépe jajuhukuaa, hetave apytépe: Mi retorno, Bienvenido hermano extranjero, Buen viaje mi amor, Quiero verte, Te vuelvo a encontrar, Paraguay tierra de amor, Amorosamente, La noche que te conocí, Yo soy la morena, La reina del ñanduti, Che vallemíre, Chemandu'ávo, Che retãme araka'etépa, Nendivéntemora'e, Che vallemi yvotytýre ha Neporã che Paraguay (Premio Nacional de Música 2003).
Carlos Sosa omanókuri táva guasu Paraguaýpe, Paraguay Retãme; ára 10 jasypoteĩ ary 1989-pe, orekorõguare 63 ary.