دولة دمية او دولة عميلة او دولة لعبة (بالانجليزى: Puppet state) مصطلح سياسى بيتقال على الدولة او الحكومة اللى موجوده بشكل رسمى انما فى الحقيقة مش بتحكم و ملهاش اى صلاحيات حقيقية و مش مستقلة و بتبقى تابعه لدولة تانيه هى اللى بتتحكم فى كل حاجة. الدولة الدمية دى ممكن يكون ليها اسمها الخاص و العلم و الدستور و القوانين البالخصوص بيها و كل حاجة موجوده فى دولة ذات سيادة و مستقلة بس فى الحقيقة بتكون تابعة و فى جيب دولة تانيه اقوى هى اللى بتتحكم فى كل حاجة فى البلد ، حاكم الدولة اللعبه دى بيكون فى الاول و الاخر لعبة فى ايد البلد المتحكمة فعلا بتحركه زى ما هى عايزه و افعاله و قراراته دايما تكون فى صالح الدولة التانيه اللى فعلا بتتحكم فى كل حاجة. من اشهر الدول الدمية هى فرنسا فيشى و جمهورية ايطاليا الاشتراكيه و دولة كرواتيا المستقلة اللى كانو تبع المانيا النازيه وقت الحرب العالميه التانيه و جمهورية الكويت اللى كانت تابعة لالعراق بعد غزو العراق للكويت . فى ناس بتعتبر قبرص الشماليه دولة لعبة لتركيا.
