Johanna Zeul

D Johanna Zeul (* 2. Juni 1981 z Filderstadt) isch e dytschi Sängeri un Liedermacheri.

d Johanna Zeul, Augschte 2011

Lääbe

D Zeul git syter anne 1996 Kunzärt, syt 2001 au mit dr Band Rotagila, wu anne 2003 in Johanna Zeul Band umgnännt woren isch. Vu 2003 bis Summer 2006 het d Johanna Zeul „Popmusikdesign“ an dr Popakademy Bade-Wirttebärg studiert. Si het d Musik fir „Max und Moritz“ (e Musiktheaterstugg fir Erwagseni) kumpeniert, wu am 6. Jänner 2007 am Mannemer Nazionaltheater urufgifert woren isch.

Im April 2008 het d Johanna Zeul mit em Martin Goldenbaum s Label Gold und Tier grindet. Im Juni 2008 isch uf däm Label s Debütalbum vu dr Johanna Zeul, Album No1, uusechuu. S Lied Ich will was Neues, wu doodruf isch, isch im Merz un April 2009 uf Blatz 10 vu dr Liederbestenliste chuu.

Am 12. Februar 2012 het si bim Finale vum Proteschtsongcontest im Wiener Rabenhoftheater mitgmacht un isch dert mit irem Lied Ich will was Neues uf dr 4. Blatz chuu. As Verdrätteri vum Land Sagse-Anhalt het d Johanna Zeul, wu dodmol z Magdeburg gwohnt het, mit em Lied Sandmann am 28. Septämber 2012 am Bundesvision Song Contest 2012 z Berlin mitgmacht un isch uf dr 15. Blatz chuu.

D Johanna Zeul läbt syter 2020 z Fischerhude bi Bremen, si engaschiuert si as Artist for Future.

Familie

D Johanna Zeul isch e Dochter vum Liedermacher Thomas Felder. Mit irem Lääbespartner, em Schauspiiler Frank Benz, het si zwoo Dechtere, wu 2011 un 2013 uf d Wält chuu sin.

Uuszaichnige

• 2006: Rio Reiser Songbryys
• 2008: 1. Bryys bim Jugend kulturell-Ferderbrys in dr Sparte „Popmusik“
• 2008: 2. Bryys bim Troubadour Chanson & Liedwettbewärb z Stuegert
• 2010: Udo Lindenberg Panikbryys (Blatz 3) vu dr Udo-Lindenberg-Stiftig.

Liederbeschtelischt

• 2009: Ich will was Neues: Blatz 10 im Merz und April
• 2009: Ferderbrys
• 2019: Labyrinth: Empfählig un Blatz 15 im Novämber
• 2022: (mit Die Grenzgänger): Propaganda der Chansons (E. Pottier): Blatz 2 im Februar und März
• 2022: Der Kapitän (C. Stählin): Blatz 8 im Septämber
• 2022: Du und ich: Empfählig im Oktober, Blatz 2 im Novämber

Diskografy

• 2008: Album Nr. 1 (Gold und Tier / Broken Silence)
• 2011: Johanna Zeul Live (Gold und Tier Records / Broken Silence)
• 2012: Sandmann (Single) (Gold und Tier Records / Broken Silence)
• 2019: Johanna Zeul (Gold und Tier / Songs United)
• 2019: Eisbär (Single)
• 2019: Labyrinth (Single)
• 2019: Reise zum Mond (Single)
• 2022: Feuer im Herzen (Album, CD in Broschüre)

Gastufdritt

• 2019: Thomas Felder un Johanna Zeul: Katzensprung – 22 vorwiegend schwäbische Kinderlieder und Wortspiele (TF)
• 2021: Die Grenzgänger un Johanna Zeul: Propaganda der Chansons (vu Eugène Pottier], uf: Die Lieder der Commune (Müller-Lüdenscheidt)
• 2022: mit em Thomas Felder: Die Liebe der Wale un solo: Der Kapitän, uf: Christof Stählin – Nur Meine Lieder. Weggefährten und Liedgenossen singen Stählin (Buschfunk) Nr. 08422

Literatur

• Arnt Cobbers: Wir sind jetzt! Frontfrauen im deutschen Pop. Schott Music, Mainz 2007, ISBN 978-3-7957-0589-3. 
• Kai Engelke: Johanna Zeul. Wilder Akustik-Punk-Pop. In: Folker, Heft 6/2009

Weblink

 Commons: Johanna Zeul – Sammlig vo Multimediadateie

• Websyte vu dr Johanna Zeul
• Johanna Zeul bi Discogs (änglisch)
• Interview mit Johanna Zeul, Reutlinger General-Anzeiger, 17. Augschte 2012

Fueßnote

Dä Artikel basiert uff ere fräie Übersetzig vu dere Version vum Artikel „Johanna_Zeul“ vu de dütsche Wikipedia. E Liste vu de Autore un Versione isch do z finde.