James Luther Slayden
| Dialäkt: Mìlhüüserdiitsch |
Dr James Luther Slayden (* 1. Jüüni 1853 z’ Mayfield, Kentucky; † 24. Hornung 1924 z’ San Antonio, Texas) ìsch a àmerikànischer Betriibsfiahrer un Politiker gsìì. Vu 1897 bis 1919 hàt’r dr Bundesschtààt Texas ìm Represantàntahüüs vu da Verainigta Schtààta vertratta.
sii Laawa un Kàrriar
ändereDr James Luther Slayden ìsch ànna 1853 z’ Mayfield ìm Süüdwäschta vum Kentucky-n-uff d’ Walt kumma. Ar ìsch dr Suhn gsìì vum Thomas A. Slayden un vu dr Letitia E. Slayden geborena Beadles. Noh-n-em Tood vu siim Vàtter hàt’r ànna 1869 mìt siinera Müatter uff New Orleans gwàndelt. Ìn da Joohra 1870 hàt’r àn dr Washington-un-Lee-Üniwärsiteet z’ Lexington ìm Virginia gschtudiart. Ànna 1876 hàt’r uff San Antonio ìm Texas gwàndelt, wu-n-’r Bàuimwullahandler un Àrwaiter ìn’ma Ranch gsìì-n-ìsch. Gliichzittlig hàt’r a politischa Làuibàhn ààgfànga, àls Mìtglìed vu dr Demokràtischa Pàrtäi. Vu 1893 bis 1895 ìsch’r Àbgoordnet’r ìm Represantàntahüüs vum Texas fìr dr 89. Wàhlbezirk gsìì. Drnooh hàt’r ìn dr Làndwìrtschàft un ìm Bargbàui gschàfft. Ànna 1910 hàt ìhn dr Fàwrìkbsìtzer un Mänschafrìnd Andrew Carnegie àls Küràtoor vu dr Carnergie-Schtìftung fìr Frìeda ärnännt. Fìr ainiga Joohra-n-ìsch dr Slayden àui Presidànt vu dr Àmerikànischa Frìedensgsällschàft gsìì.
Àn da Kongrasswàhla vu 1896 ìsch dr Slayden ìm 12. Wàhlbezirk vum Texas ìns US-Represantàntahüüs z’ Washington, D.C. gwählt worra, wu-n-’r àb’m 4. März 1897 àls Noohfolger vum George H. Noonan gsìì-n-ìsch. Ar ìsch zehn Mol wìedergwählt worra un ìsch àlso bis àm 3. März 1919 ìm Kongrass blìewa. Àb 1903 hàt’r dr 14. Wàhlbezirk vum Texas vertratta, wo grààd ärschtällt worra gsìì-n-ìsch. Ìn siinera Zitt àls Kongrassàbgoordnet’r sìnn dr Schpànisch-Àmerikànischa Kriag vu 1898 un dr Äärschta Waltkriag gsìì. Ìm Joohr 1913 hàt maa-n-ìm Kongrass dr 16. un dr 17. Verfàssungszüasàtz ràtifiziart. Àls Kongrassàbgoordnet’r hàt dr Slayden unteràndrem dr vum Iisabàhnnätzwark unterschtìtzt. Àls Mìtglìed ìm Üüssschuss fìr d’ Militäärààglagahaita hàt’r d’ Vergreesserung vum Fort Sam Houston z’ San Antonio befìrwortet. Ar hàt amol ìm Woodrow Wilson sii Kriagsminìschter wälla sìì, ìsch àwwer drbii ärfolgloos gsìì.[1] Ànna 1918 hàt sìch dr Slayden nìt fìr a näija Wìederwàhl uffgschtällt. Ìm Kongrass hàt ìhm dr Carlos Bee noohgfolgt. Ìm Septamber 1910 ìsch dr Slayden Mìtglìed vu dr àmeriànischa Delegàzioon bii dr Hundersjoohrfiir vu dr Mexikànischa Repüblik gsìì gsìì. Ar ìsch àui dr Vorsìtzenda vu dr Àmerikànischa Grupp ìn dr Interpàrlamäntàrischa Unioon gsìì.
Noh-n-em And vu siinera Zitt ìm Kongrass hàt dr Slayden a Obschtpflànzung ìm Virginia bewìrtschàftet, so wia-n-a Ranch ìm Texas un a Grüawa-n-ìm Mexiko. Dr James Slayden ìsch àm 24. Hornung 1924 z’ San Antonio gschtoorwa un ìsch därt uff’m Mission-Park-Frìedhoof beardigt worra. Ànna 1883 hàt’r d’ Ellen Maury (1860–1926) üss’m Virginia ghiiroota ghàà.[2] Zamma hann sa kää Kìnd ghàà. Ìm Slayden sii Növöö Maury Maverick (1895–1954) ìsch eewafàlls Kongrassàbgoordnet’r worra.
Dr Slayden ìsch Fräimüürer gsìì, so wia Mìtglìed ìn da Briaderschàfta Benevolent and Protective Order of Elks, St. Anthony Hall un Old Fellows. Ar ìsch àui Mìtglìed ìn dr Episkopààlkìrìch vu da Verainigta Schtààta gsìì.
Àm And vu da Joohra 1880 ìsch d’ klaina bewoohnta Ortschàft Slayden ìm Gonzales County ìm Süüda vum Texas noh-n-ìhm bnännt worra.[3]
Lìteràtüür
ändere- Slayden, James Luther (1853–1924). In: The Handbook of Texas Online. Texas State Historical Association, 1952 (englisch, tshaonline.org [abgerufen am 29. April 2022]).
- James Luther Slayden. In: Ben R. Guttery (Hrsg.): Representing Texas. CreateSpace Independent Publishing Platform, 2007, ISBN 978-1-4196-7884-4, S. 139 (google.fr [abgerufen am 29. April 2022]).
- Ellen Maury Slayden: Washington Wife: Journal of Mary Ellen (Maury) Slayden from 1897–1919. Harper & Row, New York un Evanston 1962 (englisch).
- Sondra Wyatt Gray: The Political Career of James Luther Slayden. Üniwärsiteet vum Texas z’ Austin, 1962 (englisch).
Weblìnks
ändere
Commons: James Luther Slayden – Sammlig vo Multimediadateie- James Luther Slayden im Biographical Directory of the United States Congress
- James Luther Slayden in dr Datebank vu Find a Grave
Ainzelnoohwiisa
ändere- ↑ James W. Pohl: Slayden's Defeat: A Texas Congressman Loses Bid as Wilson's Secretary of War. In: Military History of Texas and the Southwest. Band 10, 1972, S. 43–56 (englisch).
- ↑ Mary S. Pearson: Slayden, Ellen Maury (1860–1926). In: The Handbook of Texas Online. Texas State Historical Association, 1976 (englisch, tshaonline.org [abgerufen am 29. April 2022]).
- ↑ Slayden. In: Texas Almanac. Abgruefen am 29. April 2022: „It was established in the late 1880s as a station on the San Antonio and Aransas Pass Railway and named for James Luther Slayden.“
|
Dä Artikel basiert uff ere fräie Übersetzig vu dere Version vum Artikel „James_Luther_Slayden“ vu de änglische Wikipedia. E Liste vu de Autore un Versione isch do z finde. |